دعواتكم لزميلنا المفكر د.الباقر العفيف بالشفاء العاجل
|
|
 عيدية من هاشم صديق .....حكاية مشاتر
|
. .
حگاية مشاتر
ود حربويه
الحكاية الاولى
السماية
نَشّفْنَا شرموطنا
وبَصَلنا·
حضّرنا دوياتنا
وفحمنا·
دققّنا عيشنا
وعُسنا كسرتنا
وضبحنا
عزمنا حلتنا
وأهلنا
سماية يا ناس
شان مشاتر
ـ خال أبويا ـ
جابلو تومين
فوق بنيتين
··· وانشرحنا·
سمينا يوم جمعة
انجمعنا
أكلنا غَنينا
وعَرضنا
شربنا جَبَنَتْنَا
اتكينا
جبنا سيرة الناس
قطعنا
ما في زولاً
ـ جبنا طوقو ـ
إلا حاكينا وضحكنا
················
حاج مشاتر
شال عصاتو
وحَك ضهرو
وسفّ
من حُقة مبارك
وخَتّ ايدو
في دقنو
لفّ رقيبتو
··· طق ···
طقّاها
من صوتا اتخلعنا·
ودار يتُف
في الرمله
إلا البسغة جات
من خشمو
في كراعو السمينه
نحنا صنّينا
اتهجمنا
وتانى فرقعنا
وضحكنا·
قرقرنا
لامن حيلنا مات
مِعنَا في الآخر
بركنا
······
ـ الله يجازي محنك
يا مشاتر
ـ انت يا حربوية
يا نايب فَقٌرنا
ـ قالو في الجمعية
نمت
ـ نان هو كان
صاحي ومصحصح
كان ده حالنا
وحال بلدنا؟!!
··········
و···· ورجق الناس
في مشاتر
كلو زولاً قالّو
مِحْنة·
إلا تانى
الحاج مشاتر
تَفّ
واتكّا في الحصيرة
وولّعت عينيهو
حمرا
ونَفَسو قام
متل العصار
وصوتو ماع
متل السخيلة
ـ وحاة ابوي
سيدي الكبير
ما نمت في الجمعية
إلا الغمدة جات
ساعة بفكّر
في الحكومة
وفي الحصلنا
وفي بلدنا·
أيّا نمت
إلا حلمت بالشفخانة
قامت
والمشاريع خيرها
عمّ·
وشفت قامت
كم مدارس
والمواسير والكهارب
والبواجير والبكاسى
في كلو حته
········
وقام مشاتر
من حصيرو
وشو ولّع
من حجاهو
وشَمّر العراقي
في ايدو
السمينة
وجاتو نقزه·
قدامنا اتضرّع
يحاجج
بس تقول
مك المتمة·
وصوتو تلّب
في اضينا
وبزاغو رشرش
في وشينا
وتاني ورجق
بي حليفتو
ـ وحاة أبوي
سيدي الكبير
أصلي ما قصرت
في حق الجماهير
وحق بلدنا
في كلو جلسة
راسي يتقل
من وجعكم
وتجيني غمدة
وتاني احلم
بي······
··········
ونحنا هِجنَا
في حاج مشاتر
وصوتنا
بقبق من زعلنا
ـ انت يا نايب
فَقُرنا
انت نايب
ولاّ نايم؟!
ـ نحنا والله
الغلطنا
ـ انتخبنا الحاج مشاتر
ـ وقلنا يا هو
الحاج مشاتر
ود وجعنا
ـ إلا زولنا
عديل ضبحنا
··········
وقام مبارك
ومدّ اصبعو
بالغبينة الحارة
في خلقة مشاتر
وصوتو فرقع
ـ انت يا حربوية
نحنا تملي
بالمتلك كتلنا
نحنا من كضبك
فَتَرنا
ديمة في الجمعية
نايم
ونحنا من نومك
غِلِبنا
نحنا من شخريك
خجلنا
نحنا من حلمك
فترنا
··········
وقام سليمان
ود مُحُمد
وكلو يرجف
دار يسف
الحُقة وقعت
من يديهو
وقال:ـ
طلاق
انحنا بالفيك
اتفجعنا
واها·· يللاّ
انحنا من ح######
مرقنا
وانسلخنا
وانقسمنا
ملعون ابو الحزب
والسياسة
|
|
 
|
|
|
|
|
|
|
 Re: عيدية من هاشم صديق .....حكاية مشاتر (Re: dreams)
|
دريمز
جميلة ورائعة بمعنى الكلمة والحقيقة
ومن هذا المنبر أحيى ذلك الرائع هاشم صديق وأقول ليهو كل سنة وإنت طيب يازول يا رائع ... والشكر للاخت دريمز لسقينا من ذاك المنهل العذب ..... ) هاشم صديق
تحياتى
wad-sOlfab
| |
|
|
|
|
|
|
|
|
|
Re: عيدية من هاشم صديق .....حكاية مشاتر (Re: Tumadir)
|
ايوه يا تماضر ان فعلا ح انشرها
وكمان الجزء التانى من القصيدة
اللى بسسبه ترك العمل فى الحرية واستدعى سعد الدين
للجنة تحقيق عسكرية من الجيش
بس هاشم صديق كان مسافر ويادوب رجع امس
اول ما استلمها منه ح انشرها انشاء الله
تسلمى
| |
|
|
|
|
|
|
|
|
|
Re: عيدية من هاشم صديق .....حكاية مشاتر (Re: dreams)
|
الغالية أحلام
لكي ولهاشم كل التحايا
وبالمناسبة أنزلت بوست خاص بالحوار الذي تم معه لمجلة هو وهي وكما أخبرتيني فقد تم نزوله بجريدة الحرية، ومعه إهداء خاص بكي
بالمناسبة الإهداء مني وإن كان نزل بإسم نادوس
يعني لو قررت ترد لي الماعون بتاعي مليان يجيني أنا وليس لنادوس
عشتي صديقتي العزيزة.
وعاش مبدعنا هاشم
المرأة في حياة وأدب هاشم صديق
الغالية تماضر
عاش من قرأ لكي بوست
والله ليك وحشة وكل سنة وإنتي مبدعة
| |
|
|
|
|
|
|
|
|
|
Re: عيدية من هاشم صديق .....حكاية مشاتر (Re: أبنوسة)
|
الي ضمير من يعشقون الحرية
الي متي يغتال طائر الحرية الابداعية في سماء السودان ؟!
السيناريو
البرقية :
4002 الخرطوم 230 26/11 1350
هاشم صديق جريدة الحرية الخرطوم
السلام علي من اتبع الهدي ، ما ينشر بصحيفتكم من قصائد واراجيز لهاشم صديق " حكايات مشاتر حربوية " وضب وخلافة فيه تجريح واستفزاز لكل من لبس الكاكي من رموز القوات المسلحة والقوات النظامية الاخري السابقين " من قضي نحبه ومن ينتظر " الان – ضباط وضباط صف وجنود القوات المسلحة ايها السادة مؤسسة قومية تدافع عن ارض هذا الوطن وشعبة ووحدة ترابة بالدم وهي رمز عزة هذا الوطن وشموخة الي ان يرث الله الارض ومن عليها رغم انف هاشم صديق وما يقول به هاشم صديق من كلمات دقت المزيكة وانخلعنا وجانا يهتف للعساكر .. اتلخمنا جلدو اصبح لونه " كاكي " انكتمنا .. ده كلام فارغ .. فهمتو ؟ .
وان كان المناضل هاشم صديق يريد ان يعارض النظام الحاكم فالطرق لذلك متاحة سلميا وعسكريا – وهو ذاك ودون استفزاز الدخرين .
نرجو من جريدة الحرية ان تكف عن نشر ما يقول به هاشم صديق ، ونرجو ان يكف هاشم صديق ازاه عن الناس ، بالذات اهل الكاكي ورموزه بالتي هي احسن وقد اعذر من انذر ، فنحن اهل الكاكي لا بنتخلع لا بننكتم ولا بننطعن ... ولا .... فهمتو " ان الله بالغ امره قد جعل الله لكل شئ قدراً " صدق الله العظيم .
ونرجو ان تنشر الحرية هذه البرقية في نفس الصفحة
التي تنشر فيها اراجيز هاشم صديق .
ردود الافعال :
صحيفة الحرية تستجيب لارهاب البرقية وتوجيه
الناطق الرسمي للقوات المسلحة وتوقف نشر القصيدة وتعتذر للقوات المسلحة السودانية في نفس المكان الذى كان يعلن فيه عن القصيدة رغم ان القصيده لم تنشر وليس هناك فيها ما يسئ للقوات المسلحة
كمؤسسة قومية .
رفض رئيس تحرير جريدة الحرية الاعتذار للقراءة بعدم نشر القصيدة
* ترك هاشم صديق التعاون مع الصحيفة بعد موقفها الذى انحاز " للظلم " واستجاب " للارهاب " .
| |
|
|
|
|
|
|
|
|
|
Re: عيدية من هاشم صديق .....حكاية مشاتر (Re: dreams)
|
CENTER>
. . رد البرقية
هو اسمو شنو ؟!
مش اسمو الكاكي ؟!
نقول الازرق
ولاّ الاحمر
ولاّ البمبي
ولاّ الاصفر
ولاّ الرصاصي ؟!
واسم العسكر
يا هو العسكر
ولاّ اتغيّر
اسمو لشمبر
ولاّ لدفتر
ولاّ لهنكر
ولاّ اليانكي ؟!
وجمع السونكي
يا هو سوانكي
ولاّ اتغير
اسمو مغازل
ولاّ مشاتل
ولاّ بواكي ؟!
الارهاب
يا هو الارهاب
ولاّ اتبدّل
اسمو ( كباب ) ؟!
.............
الارهاب
ياهو الارهاب
لو غيرّ وش
أو بدّل باب
لو بالرُتبه
او الانساب
ارهاب في الخدمة
ارهاب متقاعد
ارهاب واقف
ارهاب قاعد
يوم تحذير
يوم تكسير
يوم استدعا
يوم استقصا
يوم تتكمم
تصبح ابكم
يوم مهووس
يبصق برقية
يوم صعلوك
ينفيك زنديه
ولسه في مايو
سرايا بقيه ..
ولسه الكاتل
نام بالديه
ولسه بلدنا
في عصر العسكر
ضيم وتكيه
كم من عمْرنا
سرقوا العسكر
يامتشبر
وسدنة " جعفر " ؟!
حكاية حساب
واي مواطن
" بجمع " و " يطرح "
وبعرف " يضرب "
لو متخرج
من " كتّاب "
بِعَرف " الحاصل " .
كم بالله
هو " حاصل "
" ضرب "
السبعة × وجعه
زمان نوفمبر
وسور العسكر ؟!
كم بالله
هٌو حاصل " جمع "
عشره وسته
في عنبر " جعفر " ؟!
وكم بالله تساوي
تلاته وعشرة
في " عصر " " الراقص ".
وطبلو الاشتر ؟!
كم بالله
تكون الحسبه
وانحنا عبيد
في زريبة الكاكي
وانحنا بقر
كاوبوينا " اليانكي "؟!
كم يا خينا هو
حاصل جمع السبعه
اتناشر
زايد حسه
تلاتة وعشره
أ ... ت ... ن ... ي ...ن ؟!
..... و .......
ت ... ل ... ا ... ت ... ي ... ن ؟!
كاكي ... و... عسكر
وحد سكين ؟!
جوع وكساح
وبيوت اشباح
تجار دين ؟!
ولاّ شنو ؟
حكاية حساب
وامسك شافع
لو متخرج
من كتّاب
بِعرف يجمع
بلقي " الحاصل "
كلو خراب ..
والارهاب
يا هو الارهاب
لو غيّر وش
او بدّل باب
ارهاب السدنه
ارهاب السلطة
وارهاب تجديد
تهديد بالبوسطه
ارهاب اقلام
مكرًيه وساقطه
جرايد جبهه
جرايد ياقطه
واي مفوًّت
لكه وحته
وتربوي فاقد
ويرقة وساقط
بترقي " لحشرة "
ويصبح ناقد
واي " نفر "
مرفود او سابق
بتخيل نفسو
تي ... اس ... اليوت
ويصبح نابغ
واي كسيح
شرباتو فسيخ
بتخيل انو
لو " شتم الباشا "
بخش تاريخ
يا ولاد الهرمه
ونكره ورمه
الحصه ثقافة
شويه وسهله
استوعب واسمع
ورد بي مهله :
شنو بالله
الفرق الواضح
بين كوميديا
والداندرمه ؟!
بين " الخشبه "
ولف العمه ؟!
بين عشمانه
وهارولد بنتر ؟!
بين الشاشة
وباب العنبر ؟!
بين الشمبر
وعبلة وعنتر ؟!
...........
جرايد بايره
تفور في الرف
ضماير ضامره
تباع بالصف
شهاده رهاب
نجاح كتاب
كمان بالشف
ارهاب بالجملة
ارهاب قطاعي
ارهاب مكتوب
ارهاب سمّاعي
لكن مع مين
والعتره محال
لو حتي مسام
الجته نصال
يا متشبّر
وسدنة جعفر
- عارفين الفرق -
الخانو الشعب
ما كل الجيش
والنصرو الشعب
مالباعو الخيش
والحقنو دمانا
ما العشمو النيش
والكاكي شرف
وسلام تعظيم
ما حكم الفرد
واكل النيم
هو اسمو شنو ؟
مش اسمو الكاكي ؟
واسم العسكر
يا هو العسكر
ولا اتغيّر
اسمو " اليانكي "
" ويا متشبر "
وجمع السونكي
يا هو سوانكي
والارهاب
ياهو الارهاب
لو غيّر وش
أو بدّل باب
ولا زالت الميلودراما مستمرة
انتبهوا ايها السادة
هاشم صديق
19/12/2002
(عدل بواسطة dreams on 12-23-2002, 10:58 AM)
| |
|
|
|
|
|
|
|
|
|
Re: عيدية من هاشم صديق .....حكاية مشاتر (Re: dreams)
|
أحلام
شكرا لكي على نشر أسباب توقف نشر صفحة الأستاذ هاشم صديق في جريدة الحرية (وهكذا هاشم يصدق شعره دائما ولو بعد حين
وما أصدقه حين اننا عادة نسمي الأسماء بغير أسماؤها في ديوانه جواب مسجل للبلد وقد ذكر نرزي العرائس ومطعم الجنة الفريدة
وها هو الزمن يضيف جريدة إسمها الحرية
وآه يا حاج يا وراق
كنت آمل فيك ومنك غير هذا
وم أشجع وأبلغ رد هاشم
| |
|
|
|
|
|
|
|
|
 Re: عيدية من هاشم صديق .....حكاية مشاتر (Re: dreams)
|
الاخت احلام
وين الحاية الثانية
نايب شمولى
دقت المزيقه
فى الرادى
اتخلعنا
صوت مشاتر
جانا يهتف للعساكر
اتلخمنا
حاج مشاتر
جلدو اصبح
لونو كاكى
انكتمنا
حاج مشاتر
صوتو اصبح
حدسوانكى
وانطعنا
يامشاتر
يوم عباية
ويوم طبنجة
| |
|
|
|
|
|
|
| |
wadsolfab
bamseka
BAKASH
bint algazeira
Mandingoo
Tumadir
أبنوسة
almohndis
فيس بوك
تويتر
انستقرام
يوتيوب
بنتيريست