|
دعواتكم لزميلنا المفكر د.الباقر العفيف بالشفاء العاجل
|
|
 Re: خيــيمة الحــردلو - العمارات (Re: Ahlalawad)
|
تحيات طيبة للاستاذ يازول
شكرا على النضمم المعسول
وخلينا نشوف المزيد من هذا العسل
طه الضرس .. حبابك
استريح الموية والقهوة في رجاك
ونحن في رجاك
ولي حد ما تجي
قال:
أبعدنا الزمان من اللهيجو بشيقنا
عاودنا السهر والنوم بقى مو رفيقنا
يامتين نلاقيهو المنشف ريقنا
ناخد بيعة من كف إيدو نحيي طريقنا
| |
 
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاستاذ ياسر
لك الشكر والتحية
والقطع اللخدر البتسوي فيه دا ما بنقدر عليه
ياكين نديك من المدخور من حق الناس
الليلة البرق من عصرو عمت الفجة
مافي مضارى غير قرة وصقيعة ولجة
في شان الزنازين والسجون والحجة
ما بنتخلى يالصديق مرابيت قجة
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
ياناس الخيم انا تب معاكم اصلو
البورد الهناك والبي هنا اصلو مابتفصلو
مدو السلوك والناس وراك يتصلو
والزول البجدع للناس الما بتحصلو
اها دايرين اب لسان ولا طوالي اقوم انصلو
ههههههههه يكه والله اول مره اكتب حاجه في خمس دقايق
زاتوووووووووو
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاستاذ ياسر محجوب
لك التحية على هذا الابداع
نحن في انتظار المزيد
الاخ الزول زاتووو
انت ولسانك مرحبابك
طرق اللسان
وهات من آخر الجراب
الاخ سنجاوي
حمدلة على الشوفة
ومشتاقين
أرجو أن نرى بقية المبدعين
جرحا فى عالجتو وابى ما يبرا
جاب لى الطشاش والتانى عدم الخبرة
اضوق الصحة لمتين والمنوسر يبرا
من الخلا عندى الواسعة زي فم ابرة
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الزينين جميع بلا فرز ..كيف حالكم نعلكم طيبين وهاكم دي
********************
كيفن أهنا واعيش وانا صبري أمسى مودع
سببي الرُخرُخ المن قام صغير متفدِع
جنيت وجِني جنَّ وحالي أصلو مبدِع
أهج شقيش شن فاضلي تاني اجدِع
**************
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
مرحب ديكنا جيت لينا آلبخات أقدامك
نختك تاج على راسنا و نقيف خدامك
نفرش ليك حريرنا و ننستر في طعامك
و أكان داير تجكس ده الجداد قدامك
أها قصرنا معاك؟ ابقى داخل آبوي .. و اعزل ليك جدادة كان عندك رغبة
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحبان رواد الخيمة جميع كيف حالكم..نعلكم طيبين
اهل العوض عووك آزول بقى عليك المثل البقول البيت محروس وستو تكوس ورينا بكان نجعت آزول الله يجازي محنك.
ياسر محجوب
السنجاوي
قرشو
يازول يازول
والله زي مابيقول اهل العوض انتو شغلكم ختري خلاس ..والله تب ما بتجادعوا..والله شغلكم نضيف ليكم التحيه..وهاكم دي من عمكم ود شوراني
************************
ياتمرة كريمه القاد سبيط عرجونك
ديسك كابي خمره وصندليه دهــونك
يقلق ويفقد الحيا والعقل مسـجــونك
مهووس بيك وذنبي عليك بقيت مرهونك
*****************
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
آخوانا .. سلام عليكم
والله أوضعتم تخاجلنا .. الشي البتسووا فيهو دا شي يفرح .. أنا طبعا ما بقدر على القطع اللخدر دا .. ياكين بجيب ليكم من الحافظو من الناس ..
طه وشنتير .. البيت محروس حرسة مجيهة .. كتر خيركم وكتر خير الاخوان سنجاوي ، الخواض ، يازول ، المسافة وحبيب الكل .. والخيمة للجميع،مشاركة الجميع .. أشكر الاعزاء يا زول وشنتير والخواض الذين ملأوا الخيمة لامن قالت بس وأصبحت مفتوحة أربعة وعشرين ساعة بهذا الادب الراقي وفوق ذاك كله رحبوا بالضيوف الذين أصبحوا شركاء أصليين .. كالاستاذ ديك الجن والاستاذ قرشو والشاعر الصنديد ياسر محجوب .
الله يديكم العافية ونسمع ونستمتع بفنكم الرائع ..
في الخيمة القديمة كنا نركز على المحفوظ من الدوبيت في أغراضه المتنوعة ، ألبل ، البنات ، الكرم والشجاعة وغيرها .. لاكين انتو أضفتوا شيء جديد وهو انتاجكم الشخصي من القطع اللخدر . الله يزيدكم من نعيمو .. أما أنا فهاكم في الابل :
رفاعة الربة قافاها البليب متدلي
زي الفاقد الاطفال بقيت متبلي
المربوعة قامتو وبالردف متعلي
ذكروا غيابو من غيرو الانس ما بسلي
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ يازول
هذا السنجاوي أب نضما يداوي
مو زعلان ، لاكيين .. غالبة عليه الحنية ، باقي بريد البنات
خلني أديك ليهو شوية من البنات
يامن خلقتني وخلقت الصيدة في مرعاها
حلحل روحي من حبل الشقاوة كفاها
قدر ما اتذكر من خدود اطرها
اتب من نومي واتلافى الهبوب أختاها
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
ديك الجن
كيف حالك آعشاي
ياخ ما تعزمونا معاكم .. جدادكم دا تضربوهو براااكم ، أكلو ان شاالله ينفعكم
لاكين ياخوي الجداد اليومين دي مطلعين فيه اشاعة قوية
خاصة بالنسبة للناس الماشين يعرسوا
انا شختيا مكجنو
خاصة الجداد الميت بتاع كنتاكي
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
اهل العوض خبر شنو آزول الجبتو في الجداد ..والله دا كلاما بجيبلو مشاكل...دحين ناس ديك الجن ويازول ديل يمشو وين...انت سمعت نكتة الديك البلع الداهية الاسمة الفياقرا..عاد يا اخوي دي مابتتقال هنا باقي الادارة اليومين دي قالوا سمها فاير يمرقنا منهم ودحسونه..وهاك دي
*************
مانـــــــي الفاسد ال بي الكِضبْ بِتنبّــــىّ
ســــــــارح بى العــــُروض لي جارتي ما بدبّى
ياستــــــار من نضم الخشوم والسِبـــــــــــّة
انا اخــــــــو الزينة عند حل الرفيق والضّبـــّة
******************
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
طه ،، وينك آ عيسي ،، ماك طيب
الديك البلغ الفايغرا ما سمعت بيه لاكين سمعت بالديك الشجدو صاحب مزرعة الدواجن .. في النهاية رجعو لي سيدو وقال ليه .. باقي نومي تقيل شوية .
اها قال ليك :
ماني ربيب بيوت بعقب بحل الصرة
وماني الخاين الـ بتبدك آ حرة
بختر ديمة في وسط الهجايم برة
داخرو ضراعي لي يوما حديدو مشرة
ناس قدر الله قاعدين في البيوت ما بخترو
ومن كبيها وكشف الحريم ما بفترو
اخير اختر براي اسد الرضيمة بنترو
صاحبي ان زل ما بفشابو سرو بسترو
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الأخوان عموم من أهل النم و الغنا نرجع للمحفوظ و
المدخور من كلام أهلنا السمح بالحيل
بينك وبين بلود العندو فوقنا حقوق
جاك صياً فسيح واطاتو فيها شقوق
علي سكر نبات الفي العلب مدقوق
قماري الجالسه خليتن يسون قوق
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
ود محجوب ..هلا هلا والله ياهو ده النضم.....وامسك دي
***************
الليلــــــة الغول بــــــــــــدا لو جفيــــــــــــــل
نقــــــرة قيد والله خوفــــــــــــاً من دمـــــــاس الليل
الزول البراطمــــــو محبّكــــــــــات بالنـــــــــــــيل
خلّا جــــــــــرايده واحدة تدوبـــــــــي واحدة تكيــــل
****************
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
هلا هلا يا طه تميت كيفنا بغول ود ضحويه و هاك من العاقب ود موسى
بسم الله يا عالم سراير العامه
شديت كوري فوق تيسي أبحجامةً جامه
من هفت لي ست ريدي أم نفايلاً تامه
بقيت نفسي من كل اللذايذ طامه
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا سلام ياود محجوب نضما سمح بالحيل...وهاك المسدار ده من عمك عبدالله ود شوراني
***************
غاب نجـــــــم النَطِح والحر علينا إشتدَ
ضَيـقـْنـا وقِصــــر لَيلُو ونهـــارُوْ إمتدَّ
نَظِرة المنـــــُّو للقانون بِقيـــت إتحدَّى
فتحـــت عنــدي منطقـــة الغُنا الإنســَدَّ
*****************
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الخواض أخـوي إت من زمان عاجبني
درشك مو خمج زينـة وغناك بطربني
أجـر النمة يا قمـري الفروع جاوبني
وين القاهو سيد عمري البيهدم ويبني
وين القاهو حاكم بي عذابي غرامـو
وين القاهو طاعم زي وجيهو كلامو
وين ألقاهو ناعم صافي دافي سلامو
شاغل بالي سهران والعـوازل نامو
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
السنجاوي
المسافه
الحبان جميع
*****
المسافة نضمك حق مابدورلو دليل
كان سمعوه ناس عمر كان بلدنا ذيه مافي مثيل
وما كان جاتنا المشاكل والشفا انضرب بالليل
ولا الناس اتشتت ذي بيوتا كسحه السيل
يا رب العباد تنجينا من شر ذي ديل
يضحك النيل ويرقص التوتيل
*********
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحبان جميع ...سلام بلا فرز
السنجاوي
ود محجوب
المسافه
اهل العوض
الخواض
يازول يازول
ديك الجن
وبقية زوار الخيمة الكرام
************
السنجاوي آخوي كيفنك ..ومشتاقين كتير والله ..قلت لي شغلك كتر ..كتر خيرك آزول هو شن جاب لي جاب ..والله نحن حيران في شياختكم وزي غناك ونضمك حرم حبه منو مابنقدر عليها ..علا ترانا بنداقش مره نصيب وميه نخيب ..الجنيات ناس المسافه وود محجوب النضم عندهم وود محجوب ده بالخصوص ما بتجادع تب .. يديك الصحة والعافية يا جنى الزينين.
**********
اهل العوض ..انت بتغطس وين يا مقطوع الطاري ..والله محنتنا تب ..الله من خلقني ما شفتلي زولا ينجع ويخلي الناس في بيته ..اظهر آزول والله نسويلنا فيك غنوة تلحقك اماتي القبيل...اها رايك شنو
***********
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
طه الضرس
آزول أكبر ها
شن قدرني على زعلك
أنا قت لك قفاي أعوج
الحكاية فيها أكل عيش وقطع رزق
باقي علينا حكم الانجليز والليد بقت ملوية
ترا كل ما نلقى ليها هبرة بنظهر
أها ما قلت لي .. رايك شنو في البيت الفوق دا .. بتاع البهم؟
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
أهل العوض
الشي الجبتو دا بيت واحد ولكنه مليان معاني عجيبة خلاص
وهموم الدنيا الفي رويسي دا اليومين ديل سدت علي باب الغنا الواسع
لكن عجبتني الفكرة .. عشان كدي هاك دي على علاتها
من قومـة الجهل أنـا والحمامة نقوقـي
أكرف في الدعاش هاني ومعاي معشوقي
كبـرت فارقتنـي وحلقـت بـي فوقـي
ياريت لا كبـرنا ولا انكويـت بي شوقي
| |
|
|
|
|
|
|
|
|
|
Re: خيــيمة الحــردلو - العمارات (Re: singawi)
|
آناس سلام والله كلامكن حلو بلحيل
أهل العوض والله آجنا الخيمة الفاهمه عندك والجنوى ديل والله ماخلولن شيتا ناقص علا نحن والله إلا نساهم بحق الرجال ويا قولك جنس القطع اللخدر دا ما بنقدر عليهو ياكين كمان ما بنقدر نفوت ساكت
أخوك يا ريّة أخوك وقت الخيول يدبكن
اخوك يا ريّة أخوك وقت الرماح يشبكن
أخوك جبل الثبات وقت القواسى يتحبكن
كم بكيت وكــم قشيت دمـوع الببكن
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا سنجاوي نشهدلك نضم و براعه
فصلت الحرير الماهو بوبلين باعه
في الظبي أب رشيرشا زي ثواني الساعه
سام روحي و نفر ضيع تلات أرباعه
يا حليل الصبى و تومتي المسك فواحه
في عشيب الأرض سايقين بهمنا مراحه
كبرت فارقتني و أعدمتني الراحه
و ربعنن البهم عاد لحقن أمات طه
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
ياللأخوان عموم و خسوسا أهل العوض
مالكم هملتوا الخيمه لامن شالته السفايه لا ورا
أها النرفعها ليكم بي قول ود ضحويه السمح
قمنا مشرقين ديك البقيت بتوايق
لجت بت عمر سرفن دموع المايق
قام بينا الضرير ما بروق ملقلق ضايق
دارج الشوح علي الكسب الوراهو طبايق
سيدك وارك الغلبه و مشي الكرعين
نبت فد مره يا ساحر الغروب من وين
يا الغول بت عمر ننظر جبينها متين
مالك يالضرير فارق صباح أم زين
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ ياسر محجوب
يسلم فمك
والله نضمك شي يخوف .. دا نجر مختلف وشغل معلمين
الله يحفظك
أنا أخشى أن بقية عمار الخيمة خافوا من هذا المستوى الرفيع الذي ظهر به شعرك ، وبالفعل أعرف واحد شاعر صنديد ومبدع حقيقي قال إنه من شدة اعجابه بشعرك تردد في المشاركة إلى جانبك
فلك التحية
أما عني فقد حصلت حاجة غريبة أمس .. طول اليوم كنت أحاول الدخول ولسبب ما كنت لا أستطيع الدخول إلى المنتدى إلا عن طريق المسنجر . واليوم انحلت بحمد الله وجهود الاخوان في الادارة
وسأعود إن شاء الله
أبيض ما انتر مسك الدرب واتناحى
تقول مكتوب لو آيات النجيع في الراحة
يجدع باع ويسرق نفسو بي بالراحة
مخلفوفتو بتجض مثل الكمنجة صياحا
| |
|
|
|
|
|
|
|
|
|
Re: خيــيمة الحــردلو - العمارات (Re: DEEK_ALJIN)
|
اهل العوض وكل الحبان آ ناس نضمكم ده ختري خلاص
سنجاوي وود المحجوب كلامكم ما بنزاد كلو كلو لكن نحاول غايتو نسوي شنو
البهم القبيل كنا بنسوقو ونسرح
ونفرح بي وراهو نغني شوقنا ونشرح
نبني بويتنا طين وللواطة نملا ونمسح
يا ريت قرنو لا قام لا رسمنا اتكتح
كم مثلت تاجوج وانا ود محلق مسرح
وكم تاتينا زي مفطوم يقوم ويترنح
وقت ما فرهد العود والبهم بقي يطرح
تفيت للزمان ما اتعلم يجمع ويطرح
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا اهل ا لعوض .. قطع شك كلامك القلتو عن الزول المعحب بي ياسر محجوب قاصدني بيه انا .. و كلامك صاح انا الزول هذا الاسمو ياسر ود محجوب غايتو ختيتلو الصحة .. بقيت بجي بتاوق بس اشوفو كتب شنو .. و عيك بكب الزوغة لي مراحي
البارح بالحيل اتظكرتك يا اهل العوض .. لانك بتسعل مني .. إن شاء الله ما سعلت منك شينة
هنا في الفرقة دي انا داير اهديلك مسدار اسمو اهل العوض .. عربون صداقة و خوة في الله و في ام زور الصاديدت ماسكة الخلا المتقفر .. و خلي اي زول يرمي عوده
بسم الله
يا اهل العوض من قلبي ليك سلامي
عارفك كان كبس همي بتقيف قدامي
سعالك مني جدد لي جرحاً دامي
جرح الابعدوا و ريدهن سكن في عضامي
أكان الدنيا يا اهل العوض بتطاوع
شن نزلني من ضهر البزيم و بباوع
فارقت البطانة و قشها المتناوع
نفسي اتقفّلت غير قوت بقنّب اتاوع
يا اهل العوض بعد المسافة الفارق
خلا لقانا مستعصي و بدور له خوارق
طريتني البطانة و حر سمومها الحارق
و طريتني الحنين و كتين يشيل لها بارق
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ سنجاوي .. ونضمك صح يداوي
المعذرة الشديدة لسببين
أولاً أمس كما يعمل الكثيرون كان عندي مشكلة في الوصول إلى المنتدى
ثانيا
أنا فعلا شفت قطعك الاخدر في بيت البنية والبهم
ولم أشا أن أرد لأني ليس لي المقدرة على مجاراة هذا الابداع
وفعلا لم يكن لدي شي للمجادعة ولكن عجبي البيت وأردت أن تشتركوا في المجاراة
أعتذر مرة أخرى
وأطلب من عمار الخيمة أن يدخلو أجاويد حتى نصلح ما حصل من خراب إن وجد
ورغم عجزي عن النظم المجيه أهديك هذه
سنجاوي العزيز نرجوك تسامح ترضى
ما بنحمل عتابك ندمنا ليك صار فرضا
نفسك عالية معروف العفو فيك فرضا
قرضك للشعر قرض المنافسين قرضا
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
شرد مطر الدغش من شقةمقفولة
باراها النعاس لامن قعد بى طولا
حباسة النفس اتكرفت من قولا
طار عصفور برق ينقر عيون مغسولة
يابت الشدر ليلك قصب، مشغولة
زحى ضرا الحديث خلي لى كلمة أقولا
تحياتى
ودعزة
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ العزيز نزار
أولا مرحب بيك في هذه الخيمة الوهيطة
شكرا على الاستجابة لمجاراة البيت
وكما أسلفت للأخ سنجاوي
لم أستطع أن أجاري هذا البيت
لكني اكتفيت بعرضه عليكم واستمتع بردودكم
بهذا النظم العجيب
تحية لك وشكرا
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحبيب أهل العوض
يازول دا من كرمك وطيب نفسك واحساسك المرهف
الله لا جاب الزعل
نحن أخوان سماح المابتخبر زعل
هترشتي ديك كانت لأني ظنيت انك ما شفت مساهمتي
وقصدت الفت نظرك ليها
دي كل الحكاية
وانت يازول ما عندك عوجة تب
وغناي بالحيل .. ما تتردد وارمي لي قدام
الحبيب نذار
حبابك ألف
نورت خيمة العمارات
ما تبخل علينا
والي التطريب
غرد أنا منك قريب
ياحمـام
| |
|
|
|
|
|
|
|
|
|
Re: خيــيمة الحــردلو - العمارات (Re: singawi)
|
الشيوخ سنجاوي واهل العوض
حبابكم الوف وشكرا لترحيبكم
اهل العوض المره الجاية اختارلك بيتا ساهل
يا ود ابوي
الكلام الجبتو ده ملان خلاس خللنا فرقة النشارك
مسعولين من الخير شيخ العرب الخيمة مو خابرها
غايتو مريت بي زولا لافح توبو ومن بعيد النضم ياهو
بيقولولو طه يبقا لي ياهو زاتو عل مالو غير اسمو
دحين انبقيت مو في افزعو
الخيمة دي هنا همبريبها يضارب
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الأحباب من أهل الخيمه ناس الكلام السمح و الله الخيمه عامره بكل جميل ولطيف من المساهمات من أهل العوض و يا زول وطه و الزول زاتو و الخواض و
سنجاوي و قرشو و المسافه وشنتير و حبيب الكل و ديك الجن و ود الجعلي و نزار حسين و ود عزه
يعني ما شاء الله فيهم الحافظ الجميل من الكلام و فيهم الشعراء الصناديد و فيهم البقطع الكلام الظريف و الطريف
أما سنجاوي و أهل العوض و شنتير و الخواض و نزار فهم أسياد الكلام و زايدين معاهو في التواضع و اللطف..... كلامكم سمح بالحيل و الواحد و الله يتشرف يكون جليسكم في هذه الخيمه الجامعه و ينهل من جمال كلامكم الصافي الأصيل و دمدتم و دام هناكم و صفاكم يا أهل النم و الغنا..... و هاكم من القطع و كلام ود محجوب في بنوتنا السمحات
طبق القيد علي في جلدي علَّم وحزَّ
و شال قلبي و قفل سوالو طبله ورزّه
وكت بالشوف أبيت كان في غميضة الهزه
يكفيني النسيم جاب من دعاشك رذَّه
أرُقصي و سوي فوق الداره قوم العايمه
و ما شبهك عوينات أم نفور الحايمه
سدرك جوز طبنجي و بي رصاصك قايمه
هنضب يا قلب خش الحراسه الدايمه
يا الظابطيه سجلي للبلاغ الآتي
في شويفع الظبا المن دابو قام بيتاتي
شال نومي و هجم بي جيش خيولو عواتي
عسكر في الضمير، قال لي براك الخاتي
يا خلاني شيشكم من شفاك المولى
ما جنيت حكم في أمري حاكم الدوله
بي سطوة جمالو و لحظوا صاحب الصوله
صاب قلبي و صبيب دماعي حاكى الشوله
أها أبقوا عافيه و أدونا الإذن في غياب كم يوم في شان المعايش علا كان لقيت فرقه بجيكم و أبقى عشره يا أهل العوض على الخيمه
| |
|
|
|
|
|
|
|
|
|
Re: خيــيمة الحــردلو - العمارات (Re: Yassir Mahgoub)
|
ود محجوب عجبني قطعك بلحيل وانا مستعجل خلاس
نحاول معاك كلمتين تلاتة اكان نحرضك زود
ود محجوب اخوي فحل الشعر والقافية
اجدع زيدنا نم اسرع قوافيك شافية
اب قيدا متني وتسفي فوقو السافية
مطعون جوه قلبو وسلبو منو العافية
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
أهل العوض .. الكلام ده جبتو من وين
جقلة كناجها فرسانها السمان درقكن
في بحر الهلاك طايعين غصب غرقكن
ود شنتير كتير فوق نارا كفى درقكن
علب نار كدوسو وفي الرضيمة حرقكن
بالحيل الكلام فوقو وسمنا .. لكين بس القالو منو ياربي الكلام ده .. اصلو بكون يوسف البنا قطعاً شك
لكين عمي الفرجوني قال لو واحدة آخرا
رون سهم ام كنيش لفن البقير في سراع
و نوق شنتير على الشدر اب سياقة رتاع
سجع قمري الرشاش في لجة الفراع
و اتنفض الغنيم جافل من التراع
نزار حســــــين !!!! إت نعل ماك
نزار ود دار جعل دعت الرضيمة الوح
بتقووا بو فرسان النحاس القح
في القانون ضليع و العز تيابو لفحا
من هنولولو صيحة المستجير بسمحا
أكان اياك زولي ده .. اها انا اياني صاحبك شيخ العرب .. و الخيمة البيهناك يدك جيرانها ما بعجبوا
اها سووا سووا آناس
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
حبيبنا سنجاوي .. ياخ قومت نفسنا ، عليك أمان الله حسبتك زعلت تب .. كتر خيرك ودا أصلك الكريم ، يا كريم النفس والقول .
نزار .. آزول إت كان كدي ما نزار الجعلي!! هللا هللا .. وشيخنا شيخ العرب ما إياهو شنتير .. إت ماك سامع نضمو المجيه دا ..
الاخ ياسر محجوب ،، آزول ها الله يزيدك في نعيمو ويديم عليك العافية .. لاكين .. أنا واحد من الناس ما بنلعب معاك .. البتسوي فيه دا .. الزينا نحن كان هبشو بيزيدو موية .. لاكين بقابلك بي شيخي شيخ العرب ، شنتير والجعلي نزار .. ديل قدرك .
شيخي وشيخ العرب شنتير .. إياها جقلة ذاااتها بتاعة يوسف .. ياخ عمك الفرجوني دا أنا طالب منو كلمات قالن في واحد صاحبن لي حساس (د. محمد عبد الله الريح) ما جاب لي طاريهن لي درب الساعة .
أها هاك من جقلة تاني :
يا جقلة العقيدك بكّر
قارسك ديمة في بلد العدو بيتوكّر
ناس بقرة وغنم انا عندي مابتتشكّر
لبنك في طب للماسكو مرض السكر
يا جقلة التمونك غالية
ناس منك غنوا وصبحت جيوب ناس خالية
ديمة عليك في الروح العزيزة مبالية
يا الشنقا الغرابية ام سراة عالية
معليش على الغلتة في البيت الفوقاني ، عدلناها وبقت شنتير
أسمع .. ياسر محجوب دا لو ماهو شايقي أنا شايف فيه نفس ود شوراني ، وللا النظر ضعف يا ربي
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
شيخنا وشيخ العربان لا حدها ياني زاتي
ويسعل منك الخير
ووالله حقيقة مشتاقين لي زمن بفتش عليك اتاريك ضارب الكنادش
بي جاي في خيمة العمارات
ومغير اسمك لي شنتير
لكن تب بلا شيخ العرب ما عندنا ليك نديهة
وفي الظانو شنتير ده جدا ليك لكن ما حا نقوليك غير شيخ العرب
عشان ما تتلخبت الكيمان ولانك فعلا شيخ عرب
اهل العوض يا زول ودمحجوب ده نحن ماني ندادتو الزول كلامو قارح بلحيل وقطعو مطارق غايتو نحن بنحرضو ليك
هسع غاتس وبقلعلكم قريب في الحجره بي نضما كتر
اها يا اهل العوض
تهليييييييييييل >لا اله الا الله
تجدني عاشق حتي الثمالة لكلام التجاني
لذلك تحريضي سيكون
وانت يا من ذقت طعم الهوي من سحر عينيه ومن خده
عيناك هاتان وقد صبغتا من كبرياء الحسن او مجده
عيناك هاتان وما فيهما من هادىء السحر ومحتده
كمضمر سرا ومن بينه مغالق الكون ولم يبده
يا صحو دنياي واحلامها ورقة العابد في زهده
مثالية الحسن وآلاءه وبر ما سلف من وعده
تعال يا لوعة قلبي وما تحرجت كفاك من وأده
نستقبل الروحي من حبنا
ونبعث الموؤود من لحده
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
كلام مجيقن .. و بدور منك الأمان يا عزيزنا ياسر بن محجوب .. و عليك من جعل محمد نبي ما تزعل مني
يا اهل العوض .. كان زمان معانا واحد دفعتنا في الجامعة .. و هو زول غليد و مفتل و دشن .. و بعد ده اسمو حاتم (إن شاء الله ما يكون في زول بعرفو هنا) .. بعدين أنا قدر ما اشوفو و اقارن بينو و بين اسمو بتخيلو زي التكنو مدخلنو في علبة صلصة .. شتان ما بين الاسم و الجسم
هسع دي لقيت ياسر محجوب .. محجوب دي حسب معرفتي بديها الشوايقة عديل و الشوايقة شعرهن مختلف عن الشعر اللتم ده .. و ياسر دي سوف تتشظى بفعل الكلام الغلاد البقول فيه ده .. يعني و الله احترت مرة واحدة .. و قلت الزول ده علا يكون متضاري بالاسم ده .. لكين تب غناه و اسمو مابيات يمشن لي سوا
إت بتقول لي فيه نفس ود شوراني .. أنا بقول فيه نفس كل شي .. و نبرة كل زولاً قاصع
==================
أهل العوض .. قلت لي النضم ده نضم يوسف؟ شكيتو على ود أب ناجمة .. الزول جاب ود شنتير ذاتو .. يا سلام يا سلام .. ده كلام تاني و بدور لو روقة و تبهلة
==========
نزار .. اها شوف أنا ما قبضتك؟ إت تاريك تتلبد متغتي لك باسماً آخر؟ و تتسحب متل قط الهويد و الصي ..
أنا و الله غيرت اسمي داك .. و لزمت عقابي .. ود شنتير ارحم لي لاني اياني ذاتو .. ترب سيد الدبساء الراسها خلال
الدبساء الراسها خلال
شايلابي الليل لا الشهلال
تترز مابية المقبال
بتسو قدلة بت رحّال
و بت رحّال هذه امرأة من بني أسد .. و في رواية أخرى .. وهكذا
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ نزار .. لك تحياتي وشكري على أبيات التجاني . فشعر التجاني شعر مميز .. قرأت مرة لكاتب مصري هو رجاء النقاش قال إنه يعرف شاعراً مصريا كان صديقا للشاعر التجاني خلاصة القصة أن التجاني حين قدم لمصر في آخر زيارة له أعطى ذلك الصديق المصري مخطوطة ديوان للتجاني فما كان من الشاعر (الصديق) المصري بعد أن علم بوفاة التجاني إلا أن طبع الديوان بإسمه !! هذا كلام مصري عن مصري ، إلا أنه لم يذكر اسم ذلك الشاعر .
شيخي ود شنتير .. عندي النص الكامل لجقلة كما سمعتها من يوسف عبد الله البنا ، كان داير قول لي ايميلك بي وين وتصلك في الحزة والحين .. اتذكرت قصة ايميلك الفقايتو مرقت مع الرسالة الرسلها ليك الهمباتي ، الله يجازي محنك .. اليوم داك أنا قلت والله أنا لو في محل أهل الحلة ديك إلا أخت شخت احمر تحت كلمة فقاية دي وأقول ليك حسن ملافضك . معانا عوايل
| |
|
|
|
|
|
|
|
|
|
Re: خيــيمة الحــردلو - العمارات (Re: Ahlalawad)
|
Dear Ahal Al-Awad, Nazar Al-ja'ali, Yasir Mahjoob, Sinjawi. I am now using a computer with no Arabic softwrare. Honestly, you are the only pals I find comfort in reading their postings. I believe that we are all spiritually connected. So, I will hereunder write my regular e-mail address hoping that you will give me you phone nnumbers when you send me an e-mail.
my regular e-mail is:
[email protected]
I want to be in a real contact with you, not just a hit-and-run-like communication.
By the way, I have some other names in sudan.net, for bad and good communication.. But with my people, like you, I would love to be as honest as I was born.
END.
Special to Ahal Al-Awad
صغيران نرعى البهم يا ليت أننا
إلى اليوم لم نكبر ولم يكبر البهم
bleive me, I didn't notice that you posted such a lyric. I saw many of those guys I love responding in a similar tone ... then I discovered that you set a challenge with that Jameel Butha'ina poetry you posted. Any way, I didn't notice that and I promise you, I will respond tomorrow in a way that will make every one perplexed.
I need your e-mails ... phones ... anything that connects me wth yuou all . You are my treasure.
Please write to me.
Akhookum Ila ma shaa Allah
Wad Shinteer
| |
|
|
|
|
|
|
|
|
|
Re: خيــيمة الحــردلو - العمارات (Re: Shinteer)
|
شيخنا وشيخ العرب لا حدها ود شنتير المو تاجر حمير
كيفنك آ الدخري
قريت كلامك البي الرطانة وقلت القلوب شواهد
لكن عليك الله كان الهمباتي اتحول معانا بي جاي
الخيمة دي ما بتكون تكنها منصوبة في الجنة
خيمة الحاردلو البي غادي دي انا لي منها الليلة دورين
وناوي ازورها لما ارجع السودان قريب
هسع داير اضرب الكنادش دي اكان جلدنا ينطلق شوية
الصديق ودشنتير
انا شخصيا معجب جدا بكتاباتك ونمك وجابوديك
وبعتبرك قائد رسن الخيمة والتواصل معاك شرف رسمي
بس الدنيا الساقية دي نسويلها شنو قدر ما تقول نتفرغ شوية
للناس الاصيلين الزيك وزي كل رواد الخيمة العرفتهم هنا
واصبحت كاني اعرفهم من سنين
هسي اهل العوض ده ان لاقاني ونضم بغباني
واللا الهمباتي واللا ود محجوب واللا سنجاوي
الناس ديل كلهم ان لاقيتم من كلمتين بفرزم من رفاقتم مع اني
ما شفتهم
شوف الساقية ساقية وتورها ارقو يقودا
نتدفابا نار الشاي دوام موقوده
آمال الترابلة البيك بقت معقودة
تظهر زي عروس في الداره لابسة عقوده
من الارض قام فرهد شمارك وشب
بالمحصول جميع الناس بقت تتنبأ
البنضورة شالت فوق فريعا الحبة
من الموية عيشك لا عطش لا غب
واكيد بنتواصل
It will not be a hit and run relationship
it is more deep and it has to be.
بس اعذرني جدا هذه الايام دي مشغول مشغولية شديده جدا
وماشي السودان
وحالتي بالبلاء
| |
|
|
|
|
|
|
| |
Ahlalawad
Yassir Mahgoub
الجندرية
ALZOLZATOO
Al-Masafaa
Shinteer
قرشـــو
7abib_alkul
WAD ELGAALI#4
almulaomar
Dafi
فيس بوك
تويتر
انستقرام
يوتيوب
بنتيريست