قصيدة
[email protected]
آ خر أمل
إتلمو جاى ضى البلد
شتيتو فى اخر الأرض
ممكون ترابنا وكلنا
رايعين قلال الزينا
* * *
إتلمو جاى ....خلونا نقدف فى الزحام
ممكن نقود رحلة أمل
جبدوها ساستاً من زمن
جروها لى بطن المحن
واهلنا من كتر الكلام
اللحنو ايضا وسوف نعمل
تاهو فى وحل الفتن
* * *
إتلمو انتو الباقى ديل
خلونا ندفق جوه فى رحم اليباب
صندلنا من عبق الكلام
قولنا السمح ....روح الفهم
مرحب فلان ..وينك امس
كلمات حنان....تمرق بشيش....تشبه نغم
وجبينا يصبح ....هالى زى وجه القمر
* * *
تعالو جاى ضى البلد
الناس خلاص ....سيف الظروف
قطع حشاها وفات بعيد
زمن الغرق ...مدد بحوره الى الابد
تعالو جاى ....
خلونا نمشى نسوى شيئ
انشاء الله نرسم ...لوحة فى صدر الظروف
مكتوب عليها
كفاية نعيش جسد
ونقوله بالسبح الكلام
يمرق يقين ...يتشابى جد
يتربى فى طين الارض
* * *
إتلمو جاى ضى البلد
بينا الزحام ....شادى المسافة ووصلنا
وشاهدين على الحزن البكى
مشواره طال ...راح انتكى
وعايشين هناك الزينا
بى عقول تشع ....زى جوهرة
وقلوب حنينة ومثمرة
* * *
تعالو جاى ضى البلد
خلونا نبنى الانهدم
نفرش قلوبنا فى كرنفال
ونقوله كب... مسكة رجال
باقى الوطن ....ناوين شموخه فى اعتدال
فى ساسه نبدأ بابتهال
نبنى السلام بالاحترام
شورة الصغير كلمة ضرا
والعز أرض
* * *
تعالو جاى ....
شتيتو فى اخر الارض
وافكارنا .... ما لماها عيد
والليلة كان لمة فريق
ذكرنى انو الزى كم
يتمنو يوم يحلو الكلام
سودانى باللهجة الوسط
لا فنجرى متعالى بى لغة الورق
لا زول تحت مدنى من نضم البلد
* * *
إتلمو انتو الباقى ديل
ورونا كيف.... تنمو السنابل فى السراب
كيفن نعمرفى الخراب
اشكالنا ما ضجة حصاد
كلمة نفير
مغروسة فى رحم البلاد
موروثة من رفع القطاطى على الشعب
* * *
تعالو جاى ضى البلد
لمو الحصاد ...الجبتو من سفر المدن
ورونا كيف الناس مشت
حق الوطن
شرف العلم
البرلمان
كيفن بخططو للسلام
* * *
إتلمو جاى ضى البلد
قول لينا كيف
ممكن نكون ....بزرة شروق اخر أمل
بالفينا من عشق الوطن
ممكون ترابنا وكلنا
رايعين قلال الزينا
إتلمو جاى ضى الوطن واخر أمل
والله الزمن روح مشى
كشف الستار
مافيش خيار
مافيش طريق ...الا الضمير العندنا
ياسر ادم عبدالرحيم (ابو عمار)
بريطانيا
2008\5\20
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة