شكل الحياة
لكل زول نظرة حياة
والنظرات كمان ....
مليون صنف
ما الدنيا ذاته ملونه
وكل لون بيشير بعيد
يحمل معانى حروفه ديك
يبحث يفتش ليه مكان
ما كل مكان بيليق معاه
* * *
عندك سواد لون الحداد
والاخضرار لون الطبيعة وبهجته
عندك بياض رمز السلام
والاحمرار لون الدماء...ومرات بيرمز للخجل
عندك سماوى ....كبدى ورمادى
وألوان كثيرة مهجنة
ما كل زول بيعرف يفسره
ما الريشة صاحبة موهبة
الفنان هو وحدو البفهما
باقى البشر بيحللو
مرات صواب....مرات خطأ
وعلى العموم لكل زول نظرة حياة
ما أعظمك يا ربنا
* * *
مرة ينتابك غموض عز الفرح
ترحل تفوت
تلحق مدائن
غراقانة فى أعمق حزن
تغرق تكب
تشرب أسى
يخلق جروح
تكبر تزيد
تفجر دواخلك بالبكاء
يطفح ألم ..
يقتل حبيب
أهى دى الحياة
لكنها بلون جديد
* * *
فى اللحظة ذاته وبهجته
البسمة تعلو كل الشفاه
هنا فى الديار
كل الحضور بى أكمله
يعزف نشيد
يرن وتر ...حساس شديد
تتموسق حروف
تنساب لحن
تفيض مشاعر كل قليب
ما قلت ليك متلونة
وكل لحظة بلون جديد
* * *
بينى بينك يا عزيز ...فرقا كبير
طول الشعر
لون العيون
شكل القوام
بعد الخطاوى فى الارض
حتى الكلام نبرات حروفه بتختلف
* * *
أحلامى وأحلامك فرق
امالك مخنوقة فى سجن
وامالى للحرية سيد ....تسبح هناك
تمشى الثريا وتسعده .. وترجع تجى
الامك الشمس بتشعله
والامى بطفيها الشعاع
* * *
لكنى برجع ليك واقول
ما هو الخلاف سنة حياة
والاتفاق مجهود عقل
والعقل نور...
لمن يشع ...
نعرف حقيقة كل زول
تظهر معالم كون وليد
* * *
نبدأ التصافح من جديد
كل زول يمسك طريق
السلام عليك ....وعليك السلام
نقطة خلاف
فى أنبل حروف
وأشرف كلام
وأصدق تعابير المعانى
النابعة من جوه القلوب
بظهر خلاف
* * *
لكنى برجع ليك وأقول
أفضل نشوف دستور رشيد
يكون مديد
يسع الجميع
والاحترام كل رأى
يفضل شعار دارنا الرشيد
ياسر ادم( أبو عمار )
Manchester
UK
00447852459009
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
