|
|
Last Updated: Jul 11th, 2011 - 15:37:55 |
مذبوح في كلما ..عَلمُ يرفرف فوق سارية الحُزن |
|
|
نادية عثمان مختار |
[email protected] |
كيفن تنوم عين الوطن
وإنسانها مضبوح زي خروف ؟؟
كيفن ننوم في بيوتنا كيف
ودارفور ملآنة سهر وخوف ؟؟
لحم الوليد ماهو الرخيص
مشوي ومقطّع بالسيوف !!
مُصران وكلوة وعين وإيد
زول أم بهيمة بقرن وصوف ؟؟
جزارة من لحم العزيز
ودم جاري سيلاً في الجروف
وين السلام والأمن وين ؟
كلمة ودموع ووجع حروف !!
*** ***
فات الخريف وجانا الخريف
خمسين خريف
ومازلنا في ذات النزيف
وسيول من الدم وغُبن وحيف
ومفاوضات ومبادرات
في الدوحة أو بُري الشريف !!
جاي الخريف تلو الخريف
ولوري العذاب ده متين بقيف ؟؟
في (كلما) كان رقص الحراب
وجسد الغلابة نزف نزيف !!
في (كلما) إتحرقوا العيال
شفنا اللحم والشيِِّة كيف !!
في (كلما) إتبغرت بطون
وشقوا القلوب
وقدوا العيون
آه يالطيف !!
*** ***
في (كلما) كان معنى الألم
في (كلما) صبح الكون عدم
في (كلما) كان الموت جبان
وياوطني مابفيد الندم
هذا الذي سفك الدماء
هل يدري عاقبة الظُلُم ؟؟
يابلدي ديل جنيات حشاك
ياسادة ماكان العشم !!
مامعني إسمنا في الوجود
وسوداني مضبوح كالغنم ؟!!
ياربي هل حقاً يجوز
فوق سارية الوطن الذبيح
نرفع عَلم ؟!!
هل نستحق رفع العَلم ؟! |
|
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع