بمناسبة الذكرى الثالثة و الأربعين لثورة أكتوبر المجيدة
موت وطن
خواطر و أسئلة حائرة من الشعب السوداني "الفضل"
مهداة إلى روح المرحوم على عبد القيوم و الى الأساتذة هاشم صديق ، محمد المكي إبراهيم و فضل الله محمد – فرسان الكلمة في تلك الحقبة الزاهية من تاريخ الشعب السوداني
فوق كيمان من الأحزان
ديك أبيى
وديك دارفور
وديك كجبار
وهناك أمري
وديك كسلا
يمين "اتفطس" السودان
....
هو عاد معقول
بلدا فيهو نهر النيل
و الإنسان يموت عطشان؟!
....
هو عاد معقول
بلدا فيهو موية النيل
مطنبجى مالى للحيضان
خيرو كتير
قمحو كتير
مريقو كتير
وتمرو كتير
والإنسان يموت جيعان؟!
....
بلاد كانت فرح وسرور
وعليها الدنيا متكبى
كل زول دار يجيها يزور
هي عاد ما كانت الجني
وبحلف بى جدودي الجد
حليفة مو حليفة زور
هي كانت جنة الرضوان
....
بعد أمطارنا سايلى سيول
وبعد مويتنا راويى حقول
وبعد خدرتنا كاسي سهول
نشفت تب.. منو المسئول؟!
....
منو المسئول؟!
شعب يصيح منو المسئول؟
وكيف سودانا يتعمر
بعد كل زول صبح مفصول؟!
....
هو عاد معقول
محل ما تمشى تلقى الزول
خات بصماتو في كل شي
وعمرو لي بلاد الله
عمارن ما بدور برهان
....
داكا طبيب
وداك جراح
وداك أستاذ
علمو للخلق من جم
وداوو المرضى و السقمان
وبعد ها الحال
كيف الزول يموت مرضان؟!
....
وعاد لمان تشوف الناس
بتسأل بس سؤال ضهبان
مهما صار وايش ما كان
بس معقول
عاد يا ناس
ده بس معقول
الشايفنو ده السودان؟!
....
يجيها الرد من طفلا سميح و صبوح
يقولها صاح... بعد ما جاهو طوفان نوح
داكا يتيم
غالبو النوم
وديك مرضاني ديمه تنوح
وطفل لقيط
ديمه يصيح بصوت مبحوح
وينا أمي
داير أبوي
دار أعرف منو المسئول؟
ولامن جاهو زول مسئول
ريحة النعمه منو تفوح
قالو تعال
برميل "كوشة" والله تروح!!
....
أروح وين؟
أقبل وين؟
أمش لي مين؟
بعد ما كنا مطامنين
وعايشين في بيوت الطين
ناكل من ضراع و جبين
ويمين فى الدنيا مو سائلين
والله الجميع مرتاح
لا في شكيى لا في أنين
وحتى ضيوفنا مرتاحين
وقاعدين في ولاد العين
....
لامن جانا يوم الغول
سال لي سيفو و السكين
قال داير يقيم الدين
قلنالو الخلاوى كتار
مو ديرالا سل سكين
وديل فقرانا سهرانين
يرتلو ديمه في القرآن
سورة طه، الرحمن وكمان يسن
....
قال لآلا
هو دينو كتر
دينو حضاري
وما بيشبه لهذا الدين
وتباعو اسمهن "إخوان"
وبعد ده الدنيا متقسمى... فسطاطين
هناك كفار...وهناك إخوان وتجار دين
....
و تانى يقول
بعد ده الزول
أمامو خيار
إما تكون مع الأخيار
وإما تكون مع الكفار
....
وعندي نصيحة للحبان
اختارو الخيار الزين
البيسكنك دورين
بعد ما كتا في بيت طين
البيركبك ليموزين
بعد ماك ماشى كداري
لاجزمات ولا نعلين
اليبشبعك ديمه
بعد ما كت مع الجايعين
البيسفرك لندن
وتشوف "الفقرا" كيف عايشين!!"
....
وترجع من هناك تخمان
وطول ليلك تصيح وتقول
يا ناس ياها دى الأديان
يمين بالله دى الأديان
لا في دقون ولا كيزان
....
بلاد مهمومة بالإنسان
عشان كدي كل زول شبعان
عشان كدي ما في زول عطشان
عشان كدي ما في زول مرضان
....
وتقيف وسط الأهل وتصيح
يمين بالله ده الإيمان
وتقيف وسط البلد وتصيح
ملعون عاد أبو "....زان"
....
وآخر القصة عندي سؤال:
للدكتور
والمرشد
ومعاهو إمام
جانا في آخر الأزمان:
ياها دى دولة الإيمان؟!
.....
ونصيحة بقولا يا إخوان
بقولا بكل فم مليان
تديين السياسة حرام
تديين السياسة إجرام
تديين السياسة جهل
تديين السياسة فقر
وكمان بيفطس الأوطان
....
ابراهيم الكرسنى
أكتوبر 2007
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة