السورة
السورة قامت للعشي
والنار مولولة في الحشي
في عيونها الانتفاضة
وفي جدومها الخربشة
... ,,,
وشايلة في الاييد سمسمية
مارقة بي احمر شفائف
في الشنطة فائحة الصندلية
ماشة في شارع المدارس
والمشية ما مشية صبية
لما رفعت راسها مرة
ليها فرمل لاندروفر
والكرونة اللونها فاقع
سيدها كان يا السورة طامع
في غرام حضرت عيونك
وفي البياض الفيكي ناصع
وكونتي في عيون المجارمة
طفلة مارقة الدنيا حالمة
بي ببسي بارد وساندوتشي
في الزحمة ذي ما تقول طرشتي
بي الكلام الهمسة همسة
والزمان الساعة خمسة
وكنتي في عيون الافندي
عنية وسط التمري هندي
محتاجة لي شويت طمي
يا بنية بي احمر شفائف
يا بنيه ليه تتلطخي
محتاجة لي شوية هدوم
ولا حبت شوق ولووم
ولا يا الخرطوم نجومك
نجمة نجمة بتنطفي
... ....
زقاق مقبل للعواصم
حافلة شاقة الامسيات
نجمة طلت للبراعم
كان تلاقي الضحكة مدخل
كان يكون يا السورة طاعم
بخورك الطالقاهو مخمل
عطر دخاخين العوادم
خلي طعم الببسي حنضل
يا ببسي كولات المطاعم
وجلدك المن خوفو نمل
في وراكين جلد ناعم
ملاحك المحشي ب لحمنا
ونحنا في السر التحمنا
كان عفص مركوبنا حشرة
قام الوقع حا نبقي عشرة
لو أخو الطورية منجل ياني خيك
لو أخو السكينة خنجر ياني ذيك
إنتي ما فد سمسمايا
وردة نبتت للتركتر
تف علي الدنيا أم بنايا
الاسد في عرينو زمجر
كور علي السفوا الترابة
اتكتح الهراش ودنقر
لو مطرت أحزان سمانا
يا السرة ترنيمة بكانا
بتشدي اوتار الكمنجة
يا طلقة في أخر الطبنجة
طبنجة في الايد الجبانة
لو نحن قشر البرتكانة
هي الرحيق الفي دمانا
عنبة بعد التمري هندي
انتي يا زهرة بنفسج
قايمة بين شجر التبلدي
باكية ليه يا السورة مالك
وباكية ليه يا السورة شندي
هي الرحيق الفي دمانا
وجلدنا المخروش وبندي
فيني أضرب يا جنابو
ماني بملك غيرو جلدي
وياخي سجل في دفاترك
كلمة كان غناها وردي
موت عزيز والدرب واسع
الشمس طلعت فيهو بدري
ماني غامض ماني حامض
لو انتي في التربة اندفنتي
حي كلامك ولسي صامد
وانتي يا فرحة ضنايا
انتي في بحر الفضائح
انتي ما فد سمسمايا
فيني ضيك فيني حنك وانتمايا
خشمك ملح خشمك ملح
موتك صبح موتك صبح
فرح اندياح عود الطلح
عارفة الحلال عارفة السمح
البقطع شامة منك هو البسرق في القمح
لا بخاف من الله سيدك لا بريدك ولا باثر فيو جرح
لو عدو الخوف الشجاعة
لو حموا البت الرضاعة
السكوت سمعا وطاعة
وقلت في السر للبنات الجونا داخلين الخيم
فاتحة لي روح الشهيدة وفاتحة لي روح القيم
الليلة ماتت وفي عروقها الدم مجمد في قصيدة
الدم بنقط في الشيم
اظني راجع للحروف وراجع ابكي علي مسيده
انحن صدقنا النصيحة
جهزنا سكين الضبيحة
جينا بي المركب نكركب
نمسح اثار الفضيحة
لقينا في القاع البنية جثة في القاع مستريحة
جثة في الاعماق تحدق للسماء الحرة الفسيحة
في اللحظة ديك قررت يابا
لما تقسي الدنيا اضحك
وابتسم رغم الكابة
إلا بس لي السورة ديا
تاني راجع للكتابة
راقدة في الموج مونكفية
العيون الميتة تحلم
بي الاماني السرمدية
في عيونها قدرت يابا اسامح الزمن الصعب
أنسي في هداءة ملامحها كل لحظات التعب
واحترمتها لما قالت تاني لا ضيعة خطاوي ولا غضب
محمد الفاتح خالد
[email protected]
4/13/2007
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة