قام بها :متحري الصحافة
قابلتها مساءً في النادي الالماني وعلى فنجان القهوة جلست إليها.. لو ما عارف نفسي جاي لمقابلة زولة بتاعة سياسة لنفيت تماماً عنها هذه الصفة (سياسية) لطيفة وبشوشة يسبقك منها الابتسام وتتبعها الضحكة القصيرة التي ظلت جزءاً ثابتاً مع كل اجاباتها.. جلسنا لمدة مفروض تكون نصف ساعة لأنها مسافرة للمفاوضات ممثلة لجبهة الشرق وهي احدى قياداتها.. اجابت بلا الحواجز التي صنعها السياسي.. واستمرت الجلسة لاكثر من الساعة حتى تضايق مني مرافقوها.
* انا آمنة محمد صالح ضرار.. اتولدت في بورتسودان واترعرعت فيها.. وتعليمي الاولى والاوسط في بورتسودان..
= بقولوا من الذوق والاتكيت ما نسأل الجنس اللطيف عن سنة الميلاد!!
* (تضحك) مش كده بالله.. لكن انا بقولها ليك عشان ما تزعل.
= انا ما بزعل لكن خايف الناس يشطحوا في عمرك..
* (تضحك ثانية) ما بنقدر على تقديرات الناس.. انا اتولدت في بورتسودان سنة 1954م..
= لسه يا دكتورة شباب..
* شكراً للمجاملة..
= القراية كلها في بورتسودان؟
* لا زي ما قلت ليك الابتدائي والاوسط هناك بعدها الثانوي في شندي الثانوية ومنها لجامعة الخرطوم كلية الآداب..
= والقراية الاكبر؟..
* الماجستير في جامعة الخرطوم والدكتوراة في جنوب افريقيا..
= انتو بجا قصدي قبيلتكم بجا؟
* ايوه بجا.. بني عامر..
= انا حأسألك عن وصولك للحتة دي من المسؤولية والمكانة وانت بتنتمي للقبيلة دي وهي معروف عنها علاقتها الخاصة بالمرأة.. يعني صعب الواحد يجيب اسم مرتو او امو او بنتو حتى..
* صحيح..
= طيب هل انتِ بطبعك متمردة عشان كده قدرتي تحققي وتكوني نائب رئيس جبهة الشرق وأمين عام في مؤتمر البجة؟
* في الحقيقة التمرد سبقني ليهو ابوي..
= نبدا بتمرد ابوك..
* جاء ابوي من قريتو الصغيرة في جنوب طوكر مع ابوه العمدة لسواكن زيارة ليها لانها كانت هي المديرية.. وابوي في الوقت داك كان طفلا صغيرا جداً.. اكتشف هناك مدرسة سواكن مش شافها.. وقت مهمة ابوه انتهت قال ليهو نرجع ابوي رفض قال ليهو لا انا ما راجع انا داير القراية وقعد..
* جدك قِبلها عادي كده ما طنطن؟
= لا وافق انو ابوي يقرأ وبالمناسبة ابوي كان بي كده أول واحد بتعلم من منطقتنا. وبقت هوايتو واهتمامو الكبير جداً بالقراية وعندو مكتبة مشهورة جداً لدرجة انو اي كتاب عن شرق السودان بالانجليزي او بالعربي بتلقاه عندو..
* ومشى في القراية؟
= لا الحقيقة قبلوه في كلية غردون لكن المصاريف كانت صعبة وما قدر عليها..
* ..............؟
= مثقف جداً.. لغة عربية وانجليزية ومعارف عامة.. واشتغل في التلغراف الانجليزي واهتم اكثر بي تاريخ البجا وهو بعرف اللغتين البجاويتين برضو..
* يعني أبوك بتكلم أربع لغات؟..
= (تضحك) والحمد لله.. كان يسافر كثير جداً عشان يدون تاريخ البجا وهو كان ما مسجل شفاهي ساكت ومن اهتماماتو كان انو بناتو يتعلمن وده بدأ من أختي الكبيرة..
= ...............؟
* كانت المدرسة الوحيدة في بورتسودان هي مدرسة كمبوني وبقبلوا فيها بنات المصريين والانجليز والاغاريق..
= القبيلة قبلت منو التمرد ده عادي كده؟
* اكيد يكون في تذمر لكن نجح وسعى مع وزارة المعارف لي انها تفتح مدرسة للبنات في منطقتنا..
= استند في تمردو ده على انو ولد عمدة؟
* ابداً استند على شخصيتو هو فقط..
= إذن ما لاقتكم مشاكل ولا من أمك؟
* لا.. بالعكس كمان حسب ما عرفت انو وقت كان بتجي السينما الصامتة كان بخلي امي وخالاتي يمشوا يحضرن عروضها كمان وكان عندو اهتمام كبير بالمسرح.
= لقاهو وين؟
* سواكن كان فيها مسرح من سنة 1926م واتعرضت فيه كمية من المسرحيات..
= كان في حاجات بتضايقو في مجتمعكم القبلي؟
* ضعف تعليم البنات ويكون داير تغيير في البيئة البجاوية في عزلها للمرأة..
= وشنو الحاجات الكان بحرص على انكم تاخدوها من مجتمعكم؟
* السلوك القبلي المتوارث والثقافة بتاعتنا وكان بقول انو اتعلم ما معناهو الخروج عن ثقافتك او تقاليدك وقيمك..
= انتِ اول واحدة من اخواتك تدخل جامعة الخرطوم؟
* ايوه.
= النقلة من بورتسودان للخرطوم والداخلية؟
* قبل الخرطوم انا قريت الثانوي في شندي الثانوية وكنت داخلية..
= ما لاقاك اعتراض على الداخلية؟
* لا.. لكن الوصايا المصاحبة تتعامل كيف تعمل شنو ودي التربية اليومية البتتوارث بواسطة الام وبواسطة الاب وفي الاجازة يسألوك بالتفاصيل المملة عن فترة القراية كلها.
= في شندي طوالي اتجانستوا؟
* اجمل ما في حياة الطلبة هو سرعة التجانس وبسهولة دخلنا مع الطالبات وهن من الشمالية وحوالى شندي وبورتسودان وكسلا وسنار وغيرها.. ايقاع الحياة الطالبية سريعة وما زالت علاقاتي مع زميلاتي من شندي الثانوية بنات قوية.
= ما ظهرت القبلية في الداخلية؟
* كنا بنعرف انو دي من القبيلة الفلانية لكن ما كان بنتعامل معاها بي ضيق افق.. الفترة ديك استفدنا فيها كعامل جامع وزادت معرفتنا بي بعض.
= ما كانت التقسيمات سياسية؟
* لا.. الشكل السياسي الحاد جاء لاحقاً..
= الانتماء للقبيلة بي اي شكل من الاشكال ممكن نعتبرو عنصرية او في درجة من درجاتها؟
* لا... لانو التكوين البشري ذاتو ببدا بالاسرة وتتوسع المسألة لغاية ما تصل القبيلة ولغاية ما تصل للأمة.. للشعب والاهتمام بي قبيلتك ما فيه شكل عنصري بالعكس هو فيه شكل كيف الارتباط بالقبيلة في داخل الارتباط بمنظومة الامة كأمة وشعب وحقو نخت في بالنا انو الامة السودانية حتى الآن ما اتكونت كأمة «لسه» المرحلة دي ما وصلناها عشان كده حكاية انك تدخل قبيلتك مع قبيلة ثانية وثالثة وكده عشان نصنع الامة..
= كنا ما دايرين نخش في السياسة يا دكتورة..
* انت الدخلتنا فيها.
= يبدو لي صعب نكون معاك وبعيدين عن السياسة..
* انت الغرقتنا فيها.. حاول نتخارج منها.
= ما دام اتبلبلنا خلينا نعوم..
* على كيفك غايتو..
= في ظني السئ دائماً بالسياسي انو هو بصنع التقسيمات دي ويحولها لي كيانات سياسية عشان يلقى ليهو كرسي سلطة حتى ولو في المعارضة.. ممكن نعتبرك نموذج لي ده؟
* ما افتكر كده.. ده بخلي الحاجات تظهر بي شكل ضيق والمصلحة الشخصية هي اللي ح تسود.. وبالنسبة للقبيلة صعب جداً تحول الامر لي مصلحة شخصية بالعكس دائماً انت بتراعي للمصلحة العامة وده هو السائد بالنسبة لي.. وفي حاجات كثيرة مع السياسة بلقى نفسو خلاها لصالح الغالبية والمصلحة العامة..
= آمنة ضرار السياسية والمسؤولة الكبيرة ودكتورة آمنة ضرار استاذة الجامعة بالاحفاد بختلفن عن بعض؟
* في ادائي التدريسي انا آمنة ضرار الاستاذة بكل ما يتطلبه الاستاذ في علاقتي بي طالباتي وموادي وعلاقتي بزميلاتي وزملائي والكتب والمكتبة والتحضير لمحاضراتي.
= والسياسية؟
* السياسة شئ مختلف.. انا ما بقدر ادمج السياسة في التدريس او العكس.. قد يكون تفكير الادارة يؤثر في تفكير السياسي وبالتالي يساعد في تطوير العمل..
= ايهما يغلب عندك السياسي ام الاستاذية؟
* (صمتت وفكرت) بتختلف.. احياناً السياسي يكون اكثر واحياناً الآخر حسب الظرف..
= لو خيرناك بي حدة ايهما الذي تختارين؟..
* الاثنين.. لو سألت الطالبات بقولن ليك دايرنها استاذة ولو سألت ناسنا ديل بقولوا دايرني معاهم سياسية.. (وتضحك)..
= الادارة اختيارك؟
* كوني ادرس ادارة كان رغبتي..
= ما كانت عندك هوايات عملت صراع داخلي عندك في اختيار مجالك؟
* كنت بهوى الرسم وبحبو جداً وكانت رغبتي بعد الادارة ادخل كلية الفنون.. وبحب الاستماع للغناء والموسيقى..
= فنانك منو؟
* الراحل المقيم مصطفى سيد أحمد.. وكابلي..
= بتدندني بي أغنيات؟
* صوتي ده شين (وجرت حرف الياء طويلاً).. والاقرب لي بقولوا لي اسكتي صوتك وحش..
= لكن براك ما بتدندني؟
* لا.. لانو نفسي ضيق وانا عندي ازمة وكنت بتساءل كيف مصطفى بغني بكل العمق ده وهو عندو ازمة وانا ما قادرة أغنى زيو.
= بترطني بجاوية؟
* قليل جداً..
= ما حاسة انو عيب عليك تكوني ما بتعرفي رطانتكم بشكل كامل؟
* لا.. ما بشعر.. الثقافة ما شرط إلا تقولها مفردات كلمات لكن هي ارتباطك بالشئ كله اكتر.. ما برطن كتير لكن بفهم كتير جداً..
= بنات دفعتك من بنات البجا بنظرن ليك كيف؟
* سؤال صعب.. مش كده.. الحقيقة بنات دفعتي من البجا ما كانن متعلمات..
= لكن غير المتعلمات..
* بلاقيهن مرات متفرقة..
= اتغير المجتمع بتاعكم من محاصرة المرأة وعدم ذكر اسمها مثلاً لدرجة تكون د. آمنة ضرار بنتهم قائدة في تنظيم سياسي بتاعهم؟
* واضح انهم اتقبلوني..
= بدون طنطنة وتمرد تحت تحت كده؟
* (تضحك) قد يكون في تمرد لكنه سطحي ما موجود لأنه في النهاية الاداء بتاع الانسان هو البحدد علاقتهم بالشخص..
= عندك رغبة تكوني رئيس جمهورية؟
* why not?.. مش الامريكان يقولوا ليك why not.. (تضحك) مافي سبب يمنعني والدستور يوافق على كده..
= وانتي حاسة انك مهيأة للدور ده؟
* احساسك انت تجاه المواطنين وحقوق الانسان وحقوق الطفل والمرأة تجاه حقوق الناس في الحياة وبعدين ما عادت مؤسسة الرئاسة هي شخص واحد.. انما هي مؤسسة كاملة.
= حكاية تجي عبر طريق قبيلة مش اضيق من انك تجي عن طريق جهة قومية اكبر؟
* انا معتزة بي جيتي بالطريقة ده..
= ما طريق ضيق شويه.. زقاق يعني مقارنة بي القومية؟
* لا ما ضيق..
= بتختلفي في المفاوضات عن وضعك في البيت؟
* باختلاف المواضيع فقط لكن انا بالي طويل وبعرف شغلانية المفاوضات دي تماماً وعندي قناعة انو الحياة مجموعة صراعات ومفاوضات مستمرة بي اشكال مختلفة.
= ما بتزهجي من طول المفاوضات؟
* المرأة عموماً بتحب التفاصيل..
= والتفاصيل دي بتزهج منكم الرجال؟
* (تضحك) هم لانهم ما بتذكروها وما بكونوا خاتين بالهم منها عشان كده بتعبوا..
= بتستمتعي بي شغلك في البيت؟
* لحدٍ ما.. احياناً..
= حسب المزاج؟
* مرات بالضرورة..
= في ذهنك هناك شخصيات معلقة ليها صور؟
* بختلفوا حسب نمو الانسان.. نماذج دائمة من الصعوبة بمكان..
= ...............؟
* اذا بعدنا عن الاسرة كانت بتصطحبني دائماً انديرا غاندي ونيلسون مانديلا وانا بعتبرو معلم شعوب في كل ما قدمه حتى في تخليه عن الحكم..
= ده يدخلنا جنوب افريقيا.. احكي لينا عنها؟
* انا عملت فيها الدكتوراة ودي من اجمل فترات حياتي صاحبت فيها جنوب افريقيا بعد خروجها من العنصرية وتكوين جنوب افريقيا الحالية.. وقدر ما تقرأ عن الصراع الحاصل ما زي لامن تشوف بقاياه وتعرف بالصورة الحقيقية عن الكان حاصل.
= ...............؟
* لقينا التقسيمات مثلاً السود كانوا بسكنوا هنا.. البيض دي اماكنهم.. والملونين برضو.. اضافة لي اننا بنقابل ناس عاشوا التجارب دي وبتسمع منهم مباشرة..
= الفصل ده كان سياسياً بس؟
* لا كان فصلا ثقافيا واجتماعيا.. لكن خلاص الحكاية دي زالت الآن ممكن الابيض يسكن مع الاسود..
= في ناس متململين بالذات البيض؟
* الاغلبية مقتنعة..
= شاركتِ في نقاشات مباشرة مع سياسيين وغيرهم؟
* حضرت عددا من ورش العمل والسمنارات اغلبها حضور فقط لكن مساهماتي دائماً بتكون في ورش العمل.
= المرأة في جنوب افريقيا ذات مشاكلها الهنا؟
* يبدو انو قضية المرأة في كل مكان هي ذاتها.. في كل افريقيا طبعاً.. لكن في اختلافات..
= مثلاً..
* اذا القوانين والدستور بساند المرأة ما بتكون المشكلة كبيرة..
= بتقدري تقارني بين طالبة سودانية او من جنوب افريقيا النتيجة لصالح منو؟
* الذخيرة المعلوماتية الموجودة في صالح بنات واولاد بره اكثر لانو بلقوا احدث الكتب، وآخر المعلومات، واجادة اللغات المتوفرة بيها المعلومات وده ما بنلقاه عندنا.. عندنا هنا حماس وذكاء اكثر واقوى ورغم كل الصعوبات ببذلوا مجهودا ليواكبوا..
= اكثر ما يضايقك عند بناتنا وبالذات عند طالباتك؟
* الكضب الكثير.. «تضحك كتير» في حاجات بحاولوا يبرروها بالكضب.. ولانهن ما كضابات بي طبعهن فبيسهل اكتشاف كضبهم او تبريرهم بالكضب.. وثانياً المذاكرة في آخر وقت. والطريف لو كلفتهم بي بحث او موضوع بجوك يقولوا ليك خلاص يا استاذة انا عملت ليك الموضوع او كتبت ليك البحث ودائماً بقول ليهم انتو ما بتكتبوا لي انا انتو بتكتبو لي روحكم. ودا جزء من طرافتهم وظرافتهم..
= البيعجبك فيهم شنو؟
* برغم مهاجمة البعض ليهم لكن انا بفتكر انهم قادرين على استخدام التكنولوجيا وقادرين كمان يعتذروا اذا اخطأوا وده نوع من الرقي..
= تأثرهم بالثقافة الوافدة؟
* هي ما بقت وافدة لانه خلاص بقى العالم قرية وهم بعايشوها..
= ............؟
* مثلاً بلقى لي واحدة لابسة ليها لبسة عجيبة بقول ليها اللبسة دي جميلة جداً لكن رأيك شنو انها ما بتنفع معانا في الجامعة هنا لكن في السهرة حتكون حاجة ما بتخلص.. صدقني بتقبلوا التوجيه بالطريقة ديه. في نوع بعصلج لكن بجي بالهداوة..
= من انصار الثوب السوداني؟
* بالنسبة لي انا طبعاً.. لكن بالنسبة للجيل بتاع الليلة ده لا.. لانو الثوب ما عملي ومرهق مع المواصلات..
= مع البنطلون والتشيرت..؟
* في دي بدخل الشكل بتاع الواحدة.. لكن انا مع الزي المريح للواحدة عشان تقدر تمشي بيهو بشكل مريح وتؤدي بيهو بدون معاناة وما يثير أي لغط او كلام..
= مع جرأة المرأة؟
* كل شيء في حدود..
= ممكن تشاهدي كرة قدم بتاعة نسوان؟
* وشاهدت كمان في جنوب افريقيا كانت بين فريق جنوب افريقيا ونيجيريا.. لكن شاهدتها في التلفزيون..
= ممكن تلعبها السودانيات؟
* ليه لا..
= ما بتتفقي مع البقولوا انها لعبة خشنة شوية؟
* الخشنة الملاكمة لكن من واقع الشفتو انا ما شايفة فيها خشونة..
= بتشجعي فريق كرة قدم؟
* ايوه.. بشجع برشلونه..
= في السودان؟..
* اسمو شنو ده (تتذكر قليلاً) الهلال..
= بتشاركي في مناسبات؟
* أكيد..
- ممكن تحضري حفل عرس وتستمتعي به؟
* حسب الفنان..
= ممكن تقعدي بمزاج لحفلة فيها فنان شباب؟
* ايوه.. جمال فرفور ماله بغني كويس..
= الاشكال الجديدة دي زي الزفة المصرية وغيرها.. كيف بتقريها؟
* الجديد ممتع.. ما قاعد اتضايق منه.. قد ما بكون بنفس قدر العراقة لكن بقول ده مزاج ناس وعلينا نحترمه.
= بتحسي انو المجتمع مرات بفرض عليك حاجات وانت ما راضياها؟
* زي شنو مثلاً؟
= يعني مثلاً تلقي نفسك في بيت بكا مفروض عليك تعزي جارتك او قريبتك وتخت يدك في رأسها و«تنوني» زي ما بتعمل امك وحبوبتك؟
* دي شروط اجتماعية وبتعامل معاها عادي..
= .............؟
* نحن محتاجون لحراك اجتماعي كبير عشان تحدث فيه تغيير.. والسياسة ما قادرة تعمل الحراك الاجتماعي ده وده دور منظمات المجتمع المدني..
= المرأة ظالمة نفسها؟
* ايوه خاصة الما عارفه حقوقها بعدم وعيها وظالمها المجتمع لانو ما بث فيها الوعي ويجي الظلم احياناً في التقاليد والضغوط الاقتصادية..
= منو المتهم في قضية ازدياد نسبة العنوسة؟
* مشتركين.. السبب اقتصادي والسبب الثاني القناعات بالطرف الثاني.. اذا ما لقت البقنعها ما بتخش في أي تجربه..
= وبالنسبة ليك..
* انا عانس بي مزاجي.. بايرة بي مزاجي..
= ليه؟..
* ما قابلت الشخص البتناسب معاي..
= لو لاقيتيهو ممكن تجيبي الشنطة انتي وتساهمي في المهر..
* والله ما فكرت في الموضوع ده..