 |
 |
 |
|
 |
 |
|
|
|
|
|
|
|
|
|
رسالة للحبيبة مقبولة وإبراهيم وكل اهلى في دارفور
القاهرة .. نادية عثمان مختار
[email protected]
يا مقبولة اسمعي قولي
انتى حبيبة
دار الفور ديارنا
الاصلو ما بنسيبها
وجعك يا هو وجعي
وانتى منى قريبة
دمك وكت يكب
شرياني فيهو حريقة
***
مقبولة الديار مخروبة
درنا عمارها
مكان كومة عويش
يا ملكة نبنى عمارة
بنات عزا مأصّل
مابندورها حقارة
الحرب اللعينة
علينا زادت نارها
إبراهيم رمادها
وثورة أخت السارة
وطنا علينا غالى
نزيفو يا هو الحارة
الحال يا حبيبة
بدور حلول ودبارة !!
** **
دارفور وجعة فينا
وفى عيونا دموع
بس شن تجدي دمعة
وداك عمر مدفوع ؟!!
طفلا مات بيرضع
في عصير الجوع
وأم فقدت جناها
وكم قليب مفجوع
صوت الحق خرس
وصوت الرصاص مسموع !
يا امة محمد وليك ننادى يسوع
دارفور بت تقية
وقبلة قايدة شموع
نامت تبكى حرقة
والقليب موجوع
وقّفوا دم نزيفها
وموتها ما مشروع !!
***
هاك يا غالية ايدى
تعالى منى قريب
هم دارفور نشيلو
من الشباب للشيب
ندافع عن ديارنا
وما يطولها غريب
سم الموت يضوقو
ونبقى ليهو دبيب
دارفور لينا خيرها
ونحنا ليها حبيب
ما بلد البيزحف
جاى شعرو سبيب !!
**
من ضرع المحنة
يضوق جنانا حليب
يا مقبولة بتي
ألما بتعرفي العيب
دارفور تبقى فرحة
والسعادة نصيب !
***
دارفور يا بلدنا
الحرب جن وجنود
كفاك وجع النزيف
حبل الصبر لي حدود
يا بت السلاطين
من جدود لجدود
يا ارض الشرافة
والكرم والجود
كفاك وجعة قليبك
والجدار مهدود
لا دمك مباح
لا بعنا كاش وعقود
لا ولدك رخيص
لا بالحرام مولود
وبت دارفور مصانة
العفة باقية خلود
من رادك مباحة
عليه سفاهتو تعود
والناشك رصاصة
نبيدو بالبارود
ومن قال غير هواك
سهمو البطش مردود !!
***