حبابك ألف يا فحل طيورالدنيا والسودان
ودأبرق حبيبنا يا طيرا عظيم الشان
أهلين بيك عزيزا في امريكا يا الخمجان
أهلين بيك لوتري وأهلين بيك لاجئا حردان
أهلين بيك طاشي وهاجي بالبلدان
ما الوجع والله حاصل عم الانس والحيوان
والحال انكسروهنت يا بلد حبيبنا يا سودان
ياك زاتك ما بغباني صوتك الرنان
وما بغباني لونك زي حمرة امدرمان
وما بغباني فعلك وانت طيرا في الطيورفنان
وات طيرا صريح ما بتتدارى بين افنان
مدرس عديل في حيشانا بالمجان
مرة دروس صباح مرة دروس عصر
في سبلوقة في راكوبة في ديوان
معلم في علما مفيد بخدم الانسان
شفتك امس العصير وانا التعيس غلبان
شفتك ساعة الرزق وانا سايق الكحيان
تكسي السجم تكسي البجم رزقة التعبان
فجأة شفتك هناك راكي فوق اغصان
فوق شدر تكساس مضبلن وماك طير فرحان
متوهط في نص عشوشات النصارى زي رمان
طويراتا سميحاتا فيهن غنج ألوان
لكنك ما كأنك زي ود ابرق الفرحان
ود ابرق الفحل المأصل من زمان وزمان
MANوما أظنك قايم بواجبك زي زمان يا
انت يا المفضوح
انت يا المسنوح
زي ما قالت حبوبتنا بت حمدان
قليل ادبا شديد لا بتحترم ضيفان
وعمرك ما كت طيرحزين خجلان
شنو الحكاية؟؟

رغم انك في بلدالترف تريان
ولياقة زي البمب وماك تعبان
وماك محتاج لصاجة في القيزان
ومحمي بقانون بلد طزيان
وعايش عيشة الشبعان
شنو الحكاية يا سجيمان؟

ومالك يا أخوي حزين مهموم؟
دحين جاك خبر هناك من شدر خرتوم؟
من يوم الطيارة الوقعت وكتلت وليد كلتوم
والناس كتلت بعض والحكومة ضاربة النوم
مع حالة النفس الصبح مكتوم
وحالة البلد محكومة بأم دلدوم
والحكم مقسوم والنفط مقسوم
والشعب خارج القوس ميت عديل مرحوم
أوعى تكون الزرازير ما لاقية عيشة اليوم؟
طبعا ما الحدية الليلة ست القوم
تختف من هنا وتختف هناك رزقة المعدوم
وات واقف شقي ومحروم
وأبو السعن الكان مرطب قالوا اغترب مظلوم
لا لاقي الجراد لا قعوي بس قالوا صايم صوم
والسمبر قالوا رافض الجية للخرتوم
بدور الامان والامن في البلد معدوم
وام قيردون الحاجة حالفة بالقيوم
ما بتجينا حتى القيامة تقوم
حتى الرهو الكان بجينا زمان
حلف ما يجينا فت يوم
وخايف من غابة فيها قدل بعشوم
وحتى النمل قالوا هاجر يغتي عرضو
من حكومة دايرة تسوي الشعب النملة بالمعلوم
عشان كده النمل قررسفر بالكوم
وهاجر لبلاد الله وماهو ملوم

بالله كلمنا كيفن جيت بلاد اليانكي يا مهموم
اظنك جيت باللوتاري يا موهوم
زي ناسا حظهم ضرب معلوم
هجروا الوطن بالقرعة ياملخوم
أهو عايشين كان كضب كان صح
bedroomعبيدا في بلاد اليانكي وساكنين مية في

أوعى تكون جيت لاجئا مقهور؟؟
ضارب الشتات بي خاترا مكسور
تارك الوطن وقاطع وراك بحور
طردوك الكلاب من حقك المسطور
لكن ما شفناك يا الاخو في قطرنا الشاقي بالعتمور
ولا في الخلق الطاشة بالبابور
والكل راضي بالمقدور
وقاصدين العشم في بلاد الطور
وتاركين الوطن للحاكم الطرطور

وما شفناك كمان في شدر (كاريتاس)*
عند ناس( لمعي ورجائي)* الكلهم احساس
يا حليلهم كتيرارحم كتيرمن ناس ضريح كدباس
بدوك حق الزيارة بذوق رقيق حساس
فيها حق العلاج وفيها حق الملاح
والباقي حق الباص والفضل للكاس
في صفا طويل فيهو البشر اكداس
شي من صومال و من سودان ومن مكناس

وما شفناك هناك في (السكاكيني)*
كنيسة سمحة ليها اجراس
شايل زيتك وشايل الصابون وايضاالاعداس
وكمان علب اناناس
ومرة ماشي الحصة وشايل الكراس
وما شفناك معانا فوق (شهاب)*
والامم الواقفة بالاكداس
قدام عمارة ماكنة ومحروسة بالحراس
زي يوم الحشر واقفين عيونا فوق للراس
يوم تاخد الرجيكشن اخير منك قرد نسناس
ده ما خبرا صعيب وجعو ما بنقاس
بس استانف مرة تانية وانده جدك العباس
ويوم تاخد اللجوء انت سيد الناس؟؟
دربك مرق للجنة و هاك ياقعدة وغني ياترباس؟؟
مبروك اللجوء اخر زمن ياناس؟؟
مبروك عليك كمان تنداس؟؟
تنداس في نار المنافي عبدا فاقد الاحساس
تف يا زمن فطاس
اولاد عزة آخر زمن ننداس؟؟

وما شفناك يوم الحليفة الحار
وات قاصد السفر لبلاد اليانكي والدولار
ابصم على كلاما دقاق تبدو فيهو اسرار
قطع شك حلفت انك ما كت شعوعي يسار؟؟
لا بتعرف ديالكتيك ولا بطيخ ولا ثوار
ولا طبقية لا منشور ولا مشوار
وشنو كانت( كيسك)* يا زرزورنا يا مغوار
قطع شك ضربوك ناس ابو الرقيع رموك في النار
لصوص الدين والتجار
عبيد الجاه والدولار
قالوا عليك فاسقا وسيد الفجار
زاني بن زاني ود ابرق المكار
وتشهد عليك الدنيا انك زير وسيد الازيار

قطع شك ودوك بيوت اشباح
وكانت كشة فيها سلاح
وادوك كفا تاح ترح تاح تاح
وقلت الروب وحي يا ووب ويا فتاح
وما كان معاك عقد نكاح
وحقك في نص المصايب راح
وعشوشة قالوا زانية وفاجرة
دقوها وكسروا فيها جناح
وشهد عليها تيس الحاجة بت تمساح
وهو تيسا زاني ليل وصباح
نازل طالع وهاك يا مراح

ان شاء الله كلمتهم يا الحبيب
ناس ضحايا الضرب والتعذيب
وسمعوا القصة بالترتيب
عن حالتك و عشوشة وحالة الترهيب
وحالة البلد العايش حالة التغريب
حالة امي وحالة امك وحكم الغيب
حالة الناس العملت قرش بالعيب
حالة الناس السارقة وعايشة في الترطيب
همباتة الحكم القعد بالضرب والترغيب
نهابة الرزق بالختف والتهريب
ماالزول السمح في بلدو خلوهو امسى غريب
اقوم من نومو هابش الجيب
اطلع من فجر وارجع بعد الشمش ما تغيب
اباطو والنجم وعطية ليهو حبيب
والقفة ترجع فاضية
ولسة الدولة هي الفاضية
ولسة هات جيب هات جيب

طيب مالك يا اخوي ما رفعت سلاح
اظنك ضارب الشدر مرتاح
يا مهمش ما الحكاية عايزة تتاح تاح تاح
تخش الغابة والادغال
معاك طيور معاك افيال
وتاخد حقك كان غلط او صاح
المهم بندق فوق مطالب فوق وبكرة انت الصاح

والمجتمع الدولي ياهوكلام الطير في الباقير
سيرسل لجنة للتحقيق شان ترفع التقرير
ستثبت ان هناك ريحة طير
وبالتأكيد هناك حدث تطهير
ومات الطير والزرزور
شنو الفرق بينك وبين بشر دارفور
ما كلكم ضحايا الحاكم الطرطور

وليه ما شفناك هناك في شدر هايكوتة؟*
لا عندك فصيل ولا قوات هناك مختوتة
ليه مولانا ما اداك عضوية من الكوتة؟؟
ما ديك الاسود والحلاليف داخلة جوة الزيطة
اخير ليك كاتل براك دي قصة تبدو عبيطة
شوف حال الجماعة احذر المرميطة
غشوهم عديل لاقسمة لا برتيتة

في الختام يا صاحبي ليك القومة
اهلين بيك كتير وفرفش وفكها الطرومة
شوف عشوشات النصارى
وارفع راسنا في المعلومة
ما هن بنات حور الطيور السمحة
واقدل في جنتك قيدومة
وبكرة نرجع للبلد
ويرجع خريفها نحومها
ويشلع بريق القبلي فيها
وتولع في سماها نجومها
واسمك فوق يا بلد
ريدتنا ليك مقسومة
وبنجيك بالعديل والزين
وابشري الليلة يا فطومة
واركز يا جنا وعلي راسك ميضنة
نحن اولاد بلد امالنا فيك محسومة
ما بننفزر هناك ساعة القومة
وما بننكسر يا خوي يا ادومة
بكرة بنولع صباحاتنا
بنار قلوبنا وتاكلي نارك يا حكومة
والحساب بيناتنا جاي
والله لو طرتوا السما
لا سلام لا نيفاشا تشفع
ولا ابوجا والجلسات بتنفع
وشدي حيلك يا حكومة
وشدي حيلك يا حكومة

هشام هباني

كاريتاس: هي منظمة قبطية مصرية تعمل مع الامم المتحدة ترعى شئون اللاجئين من خدمات اعاشية وصحية
لمعي ورجائي : الاول هو الدكتورباسم لمعي عشم الله طبيب بذات المنظمة القبطية وهو انسان بمعنى الكلمة يعرفه كل اللاجئين بالقاهرة في فترة 1999م
اما الاخ رجائي هو موظف طيب بذات المنظمة ارتبط اسمه بيوم صرف المنحة المقدمة من الامم المتحدة عبر منظمة كاريتاس حيث كان ينادي على الناس في الطابوربأسمائهم يوم ( الصرف).
شهاب: هو اسم الشارع الشهير الذي تقع فيه المفوضيةالسامية لشئون اللاجئين بالقاهرة
السكاكيني: هي الكنيسة المشهورة بالعباسية بالقاهرة التي كانت تقدم خدمات مشهودة لكل اللاجئين مسيحيين ومسلمين.
هايكوتة : هي ارض سودانية حدودية مع الجارة ارتريا حيث كانت معقل معسكرات المعارضة السودانية.