 |
 |
 |
 |
|
|
|
|
|
الفاضل إحيمر / أوتاوا
حأشرع في وجهك سلام
و أعلن عليك الحب
و أرميك بأنبل سهام
أرميك بسهام الغرام
من قلبي تصيب فيك قلب
أكلم كل الدنيا
و اشهد عليّ الرب
بأني بيك مفتون
و أني ليك محب
يا بلدي يا ستي
يالمالكه الفؤاد و اللب
************
لو شرق بيّ الزمان
أو ودى خطاي للغرب
لو ضقت حلاوة الدنيا
أو شفت المر الصعب
بجي يوم و أرجع ليك
و اسلك ليك كل درب
لو ما قدرت أطير
بهرول ليك و أخب
و إن عزّ علي المسير
بزحف ليك و أدب
مناي أرجع ليك
واطلب منك قرب
و أشرع في وجهك سلام
و أعلن عليك الحب
**********
مناي أرجع ليك
و أطلب منك قرب
مهري البقدمو ليك
نجوم السما و الشهب
و أفديك بكل عزيز
بـ "الأنا" و الضنا
بالمال بالأم بالأب
و اقضي عمري هناك
اقضي عمري معاك
أتغزل فيك و أحب
و اشرع في وجهك سلام
و أعلن عليك الحب
**********
و لحين ما زماني يريد
و ليك يخف الركب
مني ليك السلام
يشيلو ليك الغمام
و هامي سخي السحب
تقريو أسراب الحمام
كل سرب يسابق سرب
و يا بلدي ليك احترام
شاب قلبي عليه و شب
و الشوق للناس الكرام
ربات الحجى و الحجال
و الساده الزهر النجب
و يا بلدي ليك التزام
و في صحوي أو في منام
في اليقظة و الأحلام
في ظعني أو في مقام
أن أشرع في وجهك سلام
و أعلن عليك الحب
و أرميك بأنبل سهام
أرميك بسهام الغرام
من قلبي تصيب فيك قلب
أكلم كل الدنيا
و اشهد عليّ الرب
بأني بيك مفتون
و أني ليك محب
يا بلدي يا ستي
يالمالكه الفؤاد و اللب
**********
الفاضل إحيمر/ أوتاوا/ مارس 2005