شيخ الحنين

أهلا حباب المغترب
مرحب حباب المغترب
تلف شمال
تلف يمين
تمشي الغرب
تمشي الشرق
لابد يوم ترجع
تساسك في الدرب
درب الجهاز
في أوله السمسار
مسرول ود عرب
في آخره شباك القزاز
تقيف هناك
هيبة ووقار
كلك أدب
وتحية لست الحجاب
"جاهلية" بإمتياز
حدِث لا عجب
لا تعرف رشاقة ولا حساب
وفي الحنا بتجيد الرسم!
مع "عنجه" وقلة أدب
وحذاري أوعك تبتسم
لو كنت جاي من الحجاز
أوصيك أوعك تبتسم
البسمة عند المغترب
تكلف كتير
تمنها زي صيغة الدهب
قسم يمين
وعرق جبين
ينقّط من جيوبك
حبة ..حبة.. وتكتئب
تلعن ظروفك والقدر
تغلي وتسب
تعد وتحسب
عمرك الضايع هدر
في الجري ورا قطعة أرض
كبيرة! زي الباسطة الركن
معطونة بريحة الوطن
كافوري ولا جريف غرب!
الصافية ولا مهندسين
وفي آخر الحلم
حظك يبتسم
في الحاسوب طلع الملف!
ظهر الإسم
وبعد سنين
الحارة واحد وأربعين
بعد الألف!!!
"مترين ونص عند الترب"
الفاتحة علي"شيخنا إبراهيم"
فقيرنا كان زولا صعب
لا يدفع رشاوي
لايسمع حكاوي
مهمشين
يتبع خطاه
حسب هواه علي الدرب
ما بتفرق معاه
يسار يمين
لا يعرف سياسة ولا حزب
بيحلم كتير
بريحة الوطن
وباسطة ركن
في"ناصية" مرفوعة الجبين
لكنه في آخر الزمن
عرف التمن
الحلم بس "للبالغين"
والحجة للدقن الكذب
للفار السمين
الفي الحديقة
يبرّم في الشنب
يلوي الحقيقة
" للمسكين
مافيش طريقة
لا واسطة!
ولا حتي باسطة!
لشيخ الحنين
الهجا سافر وإغـترب
حلق الدقن جزَ الشنب"

ولاية الخرطوم
وزارة التخطيط العمرانى و المرافق العامة
الاسم : ابراهيم عبد العزيز عثمان
رقم الاورنيك درجة الارض مجموع الدرجات تاريخ الاستحقاق تاريخ سحب القرعة نوع الخطة مركز سحب القرعة ملحوظات طباعة هذا السجـــل

50022 1 23 1984 لم يعلن بعد العامة --

الدوحة-قطر