 |
 |
 |
 |
|
|
|
|
|
سلام يا أرض السلام الأزلي
في نظم القصيد تتواضع أشعاري
وفي النغم يدندن بالعديل والحب عودي و وتري
سلام يامهجتي وفرحتي وزاتي
ارض الحبايب بلد جدودي وأبواتي
سلام من جنوبك لشمالك
ومن شرقك لغربك
نيلك إروي أرضك
سلام إعم ربوعك
بلده بلده وقريه قريه وادي وادي
يا ما سهرت أتلى وأقرا
وأدعي في صلاتي
إجي يوم تتكاتف الأيادي
وننسى خلافنا إبقى لينا ماضي
ونرمي البندقيه ونزرع بزور قمح
نجني قطنا السمح
والشينه تتختانا لآ غادي
والأخوان مابدوروا بيناتم قاضي
والبيدخل بين بياض العين وسواده
إبقى خاسراًًًًًًًً فاضي
وحلفنا برب العباد الهادي
مابنشمت الأعادي
مبروكلك السلام يا وطني والفرحة
ليك بتنادي
من حبوبه لصغيراً إحبى إتاتي
زغروده من نفيسه إعم صداها ربوع بلادي
تلقى مريومه وعيشه واجوك ماداتنلك الايادي
وكيفن يابلدي مابنفرح بيك
وعشان عينيك
سالت دموم وإنشالت هموم
بقت زادنا يوماتي
أبشر بالسلام ابشر بالوئام
أصلو هيلنا وسمانا وارضنا ونيلنا
وحلفنا بخالقنا
ياحرب فينا تاني مابتتعادي
ياوطني شن بعدد فيك وأقول
المرغني سلالة آل البيت
نسل الرسول
وفيك المهدي وصحابو
شيكان وكرري بصمه مابتزول
ماك سمحاً من فجر تاريخك
فيك قيماً راسخة أصول
شن بعدد فيك و أقول
من أبييي لى توريد
ومن جبل الرجاف للاستوائيه بلد ميري وشول
ولا مروي ونبته حضارة ضاربة جزور
ولا في زالنجى والفاشر ودارفور
خلاوي قرآن تقابة نارُ
ما ماتت مر العصور
وشن بعدد فيك واقول
وفيك عبد الفضيل الماظ ودحبوبه
والقرشي والمحجوب البقوا لينا دليل
وكيفن مابنفرح بيك يابلدي
وفيك قوس قزح من الألوان
جوامع جنب كنايس
سلام أديان
في شلوخ التومه
ومطارق بتول
وسلم ود الحاج
وفي وشي السنجك
كلها للحب والسلام عنوان
وكيفن مابنفرح بيك يابلدي
وفيك العديل والزين
ومن كريمه لآ حلفا وتقبل لآ كسلا
والقضارف عشى المضيومين
وفيك أهلي الغبش ملوك السلطنة الزرقا
ولله بره حدودك للعلم ناشرين
وفيك كنساب بلد فرح ود تكتوك
للحكمه والعلم دليل وكتاب
وكان للخير ناسو وأهلو قاعدين
متل علي دينار وقفو ميقات للمحرمين
آبار علي في بلاد الحرمين
وكيفن عاد مابفرح بيك يابلدي
وفيك رفاعة أبوسن
بكان النور والعلم
بابكر بدري واحفادوا فيك
للجهل سلوا سيف القلم
بيهو نشروا النور و العلم في
كل بيت وقريه نور وعم
وكيفن مابنفرح بسلامك يابلدي
وإنت السلام
في مديح البرعي للرسول شفيع الأمم
وفي قبب ال99 بنيه
ورجال أبوحراز وأم ضواًّ بان
وفيك الأزهري فجر الاستقلال
تاريخ ومهابه في امدرمان
عاهدنا الله مابنفرط في سلامك
عشت رمز العزة ياسودان
والبدور الحب والعيشه الهنيه
إلقى بيناتنا بكان
نحميك ونفديك يابلدي
وكان ياما كان
في سالف العصر والأوان
عثمان دقنه قائد الفرسان
أول شهيد وقدمنا احمد وآدم والتوم
وقرماي و أويت وأبوعيشه وموسى وعطاالمنان
أرواحاً تمن للسلام
إعاينولنا من جنة الواحد الديان
وإباركولنا يابلدي الأمان
وتقول لي نفرط فيك ياوطني
وإنت للخير سنام
وشن بعدد فيك يابلدي وأقول
ماكل شبر فيك إحكي تاريخ وفصول
وإنت حقيقه بين الأوطان مامستحيل
دحين اقدل يابلدي
قامة العز فيك مابتميل
وفيك عبد الله الطيب والفيتوري
والطيب صالح عرس الزين يازول
وفيك سوار الدهب إزين
جيدك بيه إطول
بكره نبنيك ياوطن بالسلام
نرويك بالحب وفيك النيل
إتمدد شرايين في جسمك
إروي مزارع وحقول
وإغسل وشي عروساً سمحه
سموها في شمالنا نخيل
شايله الرطب والقنديل
شن بعدد فيك وأقول
في شندي والمحميه ود المك نمر
فارس المكاده نتغنابو من جيل لآجيل
ماقبل الحقارة حرق عدوه عديل
ما إتلفت تاليتها قبيل
دحين وقت نقرا تاريخنا ونتصفح
مابنفرط في سلامنا
مابنبدل كلامنا
تاريخنا يابلدي ما ببقى ماضي
وماببقى كنا
إبقى مستقبلنا
بيه نعيش نتهنى
تبقى لولادك جنه
وتبقى من صدر الأم أحن
في نيلك روانا
وفي سلامك إتحقق املنا
كيفن مابنفرح بيك يابلدي
وفيك البراعم متفتحين
وفيك الغبش ساجدين
وفيك الأوليا الصالحين
وفيك ولادك للثغور حارسين
قواتك بحبك متسلحين
وحاة الله عيونم أحد من الصقور
عليك طايرين
إسعدك ياوطني رب العالمين
وشن بقول غير آمين
وشن بتقلوا ياسامعين
غير آمين
بقلم / حنان باشري .